Euskal Autonomia Erkidegoko Desgaitasuna Duten Pertsonen Konfederazio Koordinatzaileak txosten bat prestatu du urritasunen bat dutenen eskubideen inguruan. Uztailaren 12an Eusko Legebiltzarreko hauteskundeetara aurkeztuko diren alderdiei helarazi die 28 puntuz osaturiko idazki hori. Bide orri modura sortu dute txostena; hortaz, haren bitartez, Elkartean-ek eskatuko du ahalegina egitea landutako puntu guztiak betetzeko, eta ez murriztea desgaitasunarekin zerikusia duten «eskubideak, zerbitzuak eta laguntzak».
Sei multzotan banatzen dira alderdi politikoei bidalitako eskaera guztiak: bizimodu independentea, irisgarritasun unibertsala, enplegu arrunta, hezkuntza, emakumea eta osasuna. Jarduera eremu bakoitzean eskaera multzo bat bildu dute txostenean, betiere Elkartean-ek duen helburua abiapuntu hartuta: «Desgaitasuna dutenen aukera berdintasuna bermatzea». Txostena prestatzeaz gain, sare sozialen bitartez sortutako proiektua gizarteratu du.
Hauteskundeen ondoren ere lanean jarraitu nahia erakutsi du Elkartean-ek. Gobernu berriari elkarlanean aritzeko eskaera egingo dio, eta alderdi guztien arteko lankidetzarako deia ere egin du. Elkartean-en ustetan, datorren legealdia mugarria izango da desgaitasunen inguruko gaiak lantzen jarraitzeko.
