Arabako Probintzia Auzitegiak astelehenean egin zien ohartarazpena EAJren Araba Buru Batzarreko kide ohi Alfredo de Miguel eta Koldo Otxandianori: 72 orduko epea zuten kartzelan sartzeko, eta, bete ezean, «beharrezko aginduak» emango zizkien segurtasun indarrei bi kideak atxilotzeko eta espetxeratzeko. Bada, atzo goizean Zaballako espetxean (Araba) sartu zen De Miguel, 09:25ean, auzitegiak kartzelan sartzeko emandako epemuga bete baino ordu batzuk lehenago. De Migueli hamabi urte eta lau hilabeteko zigorra ezarri zioten, EAJk gobernatutako zenbait administrazioren kontratu publikoetan legez kanpoko komisioak kobratzeagatik eta prebarikazioa egiteagatik, baina, alegazioak tarteko, sei hilabete atzeratu du espetxeratzea.
De Miguel auzian zigortutako beste batek, Koldo Otxandianok, herenegun aurkeztu zuen bere burua espetxean, auzitegiaren abisua jasota. Zazpi urteko zigorra ezarri zion Arabako Probintzia Auzitegiak, besteak beste eroskeria, dirua zuritzea eta influentzia trafikoa leporatuta.
Zigorrak urte hasieran berretsi zituen Espainiako Auzitegi Gorenak, eta martxoan helarazi zion erabakia Arabako Probintzia Auzitegiari. Hark 24 orduan argitaratu zuen epaia irmo egiten zuen autoa, eta hamar eguneko epea ezarri zien De Migueli eta Otxandianori kartzelan sartzeko. Gauza bera agindu zien Aitor Telleria EAJko kide ohiari eta Xabier Sanchez Robles Eusko Jaurlaritzako Gazteriako zuzendari ohiari ere. Hala ere, Sanchez zen orain arte espetxean zegoen bakarra.
De Miguel espetxean sartu da, epemuga igaro baino ordu batzuk lehenago
Zaballako kartzelan sartu da, hamabi urteko zigorra betetzeko. Koldo Otxandiano auzipetuak asteazken iluntzean aurkeztu zuen bere burua
Iruzkinak
Ez dago iruzkinik
Ordenatu
