8.000 pertsonak baino gehiagok galdu zuten bizia COVID-19ak jota Araba, Bizkai eta Gipuzkoan, eta horiek omendu dituzte gaur Gasteizko Sempervirens parkean.
Alberto Martinez Eusko Jaurlaritzako Osasun sailburua eta Maider Etxebarria Gasteizko alkatea izan dira ekitaldian, eta loreak eskaini dizkiete biktimei, haien omenez landatutako sekuoiaren azpian. «Ez ditut ahaztu nahi biktima horiek guztiak, eta elkartasuna adierazi nahi diet gehien sufritu zutenei, ez baitugu ahaztu nahi eta ezin dugulako ahaztu kopuru horien atzean familiak eta pertsonak daudela», adierazi du Martinezek.
Nabarmendu du Osasun Sailaren lehentasuna beti izan dela herritarren osasuna babestea, «bereziki jende ahularena». Hainbat balio azpimarratu ditu zeregin horretarako: «Elkartasuna, enpatia, umiltasuna eta talde lana».
Alzheimerraren Mundu Eguna ere bada gaur, eta gai hori ere hizpidera ekarri du sailburuak: «Jaurlaritza gisa, aurrera egingo dugu Euskadin alzheimerra duten guztien eta haien familien bizi kalitatea hobetzeko aurrerantzean ere».
