Elixabete Etxanobe Bizkaiko ahaldun nagusiak Carlos Alzaga izendatu du Azpiegitura eta Lurralde Garapenerako diputatu. Imanol Pradales EAJko lehendakarigaiaren tokia beteko du. Atzoko gobernu kontseiluaren ostean jakinarazi zuten Ainara Basurko izendatu zutela Pradalesen ordezko, behin-behinean, Pradalesek atzo bertan utzi baitzuen kargua, azken gobernu bilera izan ostean.
Iragarri zuten luze gabe izendatuko zutela diputatu berria, eta gaur bertan jakinarazi dute, ohar bidez, Carlos Alzaga (Zornotza, Bizkaia, 1964) izango dela. Datorren ostiralean hartuko du kargua.
Alzaga Eusko Jaurlaritzako funtzionarioa da. Gaur egun, Euskadiko Bide, Ubide eta Portuetako Ingeniarien Elkargoko dekanoa da, eta Bizkaiko portuko zuzendaria. Bi kargu horiek utzi egin beharko ditu diputatuarena hartzerako.
