Internet sarearen eta telefono zerbitzuen matxurak ez dira apartekoak, baina bai matxura bat konpontzeko 127 egun behar izatea; are gehiago kaltetua erabiltzaile bakarra ez, baina herri baten biztanleen erdiak direnean, udala eta osasun zerbitzuak barne. Hori gertatu da Buñuelen (Nafarroa). Apirilaren 3an, telefono zerbitzua eten egin zitzaien Movistar konpainiarekin kontratua zutenei, eta gaur berreskuratu dute, 127 egun geroago.
Udalak azaldu du Movistar konpainiaren eta hari ingeniaritza zerbitzuak ematen dizkion hornitzailearen arteko arazoak egon direla tarte luze horretan. Enrique Villafranca alkateak «sumindura» erakutsi du, herriko pertsona ugari «ezinean» utzi dituelako telefono konpainiak: «Arazo hau askoz ere azkarrago konponduko zen enpresek gure beharrak serio hartu izan balituzte. Herri txiki bat gara, baina gure bizilagunek beste edozein herritako biztanleen pareko errespetua merezi dute». Erantsi du Buñuelen pairatu duten egoerak ez duela laguntzen hustutako landa herriak betetzen.
