Bullying-a egiten duten ikasleen kontrako neurriak hartuko zituela hitzemana zuen Gabriel Attal Frantziako Hezkuntza ministro berriak, eta hala egin du. Gaurko Frantziako Aldizkari Ofizialean agertu da neurria: beste ikasle bati jazartzen dion ikaslea eskolaz aldatzeko erabakia hartzen ahalko dute eskoletako zuzendariek. Herriko beste eskola batean eman beharko du izena, eta, han, pedagogia jarraipena egin beharko diote urte bukaerara arte gutxienez. Herrian ez bada beste eskolarik, inguruko herri batek onartu beharko du ikaslea, jatorrizko eskolatik kanporatu ahal izateko.
Neurri hori aplikatu aitzin, eskola zuzendariek bost egunez kanporatzen ahal dituzte jazarpena egiten duten ikasleak. Haatik, jazarpenak epe horretatik aitzina segitzen badu, herriko auzapezari galdetzen ahalko diote ikaslea eskola horretatik atera eta beste batera bidaltzeko. Eskolaz aldatzen duten bitartean, ez da onartua izanen biktima dagoen eskolan.
