Bilboko Errekalde auzoko Etxarri II gaztetxea hustu du Ertzaintzak. 09:00etarako zegoen emana agindua, baina lehenagotik hasi da Ertzaintza eraikinera sartzeko ahaleginetan. Barruan itxita zeuden zenbait gazte, eta haienganaino iritsi dira ertzainak. Denak kanporatu dituzte, baina ez dituzte atxilo eraman. Eusko Jaurlaritzako Segurtasun Sailak jakinarazi duenez, zehapen espedientea ireki diete, Herritarren Segurtasunerako Legea urratzeagatik.
Ondoko garajetik sartu da Polizia gaztetxera. Pareta zulatzen eman dute goiza, gaztetxeko teilatura iritsi diren arte —zenbait gaztek bertan eman dute gaua—. Horren ostean, eraikinaren barruan aritu dira ertzainak zenbait minutuz, beste gazterik ba ote zegoen ikusteko, eta husteko lana bukatutzat jo dute. Barruan zeuden gazteek alde egin dutenean, manifestariak ere joan dira; Ertzaintza bakarrik geratu da.
Hustea salatzeko, gaztetxeko kideek manifestazioa antolatu dute gaur arratsalderako; ehunka lagunek bat egin dute deialdiarekin. «Poliziaren jazarpena eta basakeria ere salatuko ditugu manifestazioan», azpimarratu du Iker Villanueva gaztetxeko bozeramaileak. Eta hustearen eta eremu horretan egin nahi duten «proiektu urbanistiko elitistaren» erantzuleak seinalatu ditu: «Bilboko Udala eta Hirigintza zinegotzia». Horrez gain, «interes pribatu horien atzean dauden enpresa handiak» ere izan ditu jomugan; adibide gisa jarri du Amenabar enpresa. Polizia ere erantzuletzat jo du, husteko lana gauzatzeagatik.
«Urte hauetan, [gaztetxea] sozializaziorako eta politizaziorako gunea izan da hainbat gazte belaunaldirentzat, baita aisialdi alternatibo batez gozatzeko lekua ere»
IKER VILLANUEVAEtxarri II gaztetxeko bozeramailea
Ertzaintza eraikinera sartzen saiatzen ari zen bitartean, berrehun herritar baino gehiago batu dira kanpoaldean, gaztetxeko kideek sare sozialetan eginiko deialdiari erantzunez, barruan zirenei sostengua adierazteko. Goizaldetik, agerikoak izan dira gaztetxearen aldeko keinuak eta aldarrikapenak. 07:30ean, gaztetxearen barruan zirenek bengala bat piztu dute, eta 08:00etan suziriak bota dituzte. Kanpoan zeudenek, berriz, oihuen eta txaloen bidez helarazi diete elkartasuna barrukoei. Besteak beste, «Etxarri aurrera», «gazte langile, ez zaitez makurtu», «okupazioa delitua bada, gora delinkuentzia» eta «jazarpen polizialari aurre egin» oihukatzen ibili dira.
Etxarri II-ko kideek sare sozialetan jakinarazi dutenez, Ertzaintza goizean goizetik ari zen gaztetxera sartu nahian. Operazio handia antolatu du gaurko kaleratzerako: atzotik furgoneta ugari egon dira gaztetxearen ingurumarietan, eta ertzainak alboko eraikinetako teilatuetan jarri dira. Droneak ere erabili dituzte, eraikina zaintzeko. 09:30 aldera, gainera, helikoptero bat gerturatu da, eta bueltak ematen ibili da eraikinaren inguruan. Herenegun ere bertan izan zen Ertzaintza, baina alde egin zuen gero.
Adi!
— ETXARRI 2 GAZTETXEA (@Etxarri2gaztetx) April 4, 2025
Poliziak gaueko hainbat ordu daramatza ondoko eraikinetatik gaztetxera sartu nahian. Orain dronekin begiratzen dabiltza eta presentzia poliziala areagotu dute.
Hurbildu kideei elkartasuna adieraztera!
Etxarriren desalojoa gelditu! pic.twitter.com/BixlO4EH59
Atzo, 20:30ean, manifestazioa egin zuten, Errekaldeko osasun zentrotik abiatuta. Ertzaintza oldartu egin zitzaien gazteei, eta istiluak sortu ziren 21:00 aldera. Sare Antifaxistak sare sozialetan adierazi duenez, sei manifestari zauritu dituzte bart. Ertzaintzak esan du istiluetan lau ertzain ere zauritu direla.
Suziriak berriz ere Gaztetxe barrutik.
— Gedar.eus (@GedarLangileKZ) April 4, 2025
Gero eta jende gehiago kanpoaldean, Etxarriren defentsan eta barruan dauden kideekin elkartasunez. pic.twitter.com/xvC3DXh34z
Bost atxilotu bart
Manifestarien aurkako oldarraldian, bart, bost lagun atxilotu zituen Ertzaintzak, gaztetxeko kideen arabera; lau aske daude, eta bosgarrenaren berririk ez dute eman. Poliziaren bortizkeria salatu du horietako batek, hedabide horretan: «Azaldu du atxilotu ostean ertzainek jipoitu egin zutela furgoi barruan. Zauriturik dago». Atxilotuei elkartasuna adierazi nahi diete gaurko manifestazioan.
2014an okupatu zuten Bilboko Errekalde auzoko Etxarri II gaztetxea. «Kukutza III eraistearen ondorioz auzoko gazte langileok izan genituen beharrei erantzun kolektibo bat emateko helburuz», gogoratu zuten joan den hilean. Ordutik, hitzaldi, erakusketa, jaialdi eta batzar ugari antolatu dituzte.
Auzoaren erantzuna eta gaztetxeari emandako babesa nabarmendu ditu Villanuevak. «Hamar urte baino gehiagoko proiektu baten alde egin dute auzokideek; urte hauetan, sozializaziorako eta politizaziorako gunea izan da hainbat gazte belaunaldirentzat, baita aisialdi alternatibo batez gozatzeko lekua ere», esan du, eta argi utzi horrek erakusten duela proiektua garrantzitsua dela, eta horregatik erantzuna «irmoa» izan dela. Aurreko asteetan, auzoko eta inguruko hirurogei eragilek, komertziok eta hogei artista inguruk husteko agindua bertan behera uzteko eskatu dute, adierazpen baten bitartez. Horrez gain, joan den ostiralean manifestazio jendetsua antolatu zuten auzoan.
Ez da Etxarri gaztetxea hustu duten lehenengo aldia. 2016an, Bilboko Udalak Etxarri ixteko agindua eman zuen, gaztetxearen segurtasun neurriak aitzakia hartuta. «Itxiera izan behar zuena huste bihurtu zen 2016ko azaroan», gogoratu dute sare sozialetan zabaldutako bideo batean. «Hormigoizko hormak altxatu, ateak soldatu, eta ura eta argia kendu zituzten». Hala ere, asanbladako kideak barrura sartu ziren, eta barrutik gaztetxea txukuntzen hasi. 2018an jakinarazi zuten proiektuari jarraipena emango ziotela, eta Etxarri II izena jarri zioten.
Handik gutxira heldu zen berriz ere husteko agindua, eta horren kontrako elkartasun kanpaina bat jarri zuten abian. Euskal Herri osotik jaso zuten babesa. 2020ko urrirako ezarri zuten husteko agindua, baina, «antolatutako babesari esker», husteko lanak gelditzea lortu zuten, eta «borroka egitea merezi duela erakutsi eta asanbladako kideak erabat indartu».
«Neurriz kanpoko» ekintza
Bilboko EH Bilduk ohar bidez adierazi du poliziak gaztetxearen kontra egindako ekintza «neurriz kanpokoa» izan dela. Are, atzoko manifestazioan gomazko pilotak erabili izana ere salatu du. «Horren ondorioak aski ezagunak dira Bilbon».
«Errekaldeko gaztetxea husteak ez luke izan behar, inola ere, egoera honi heltzeko modua», azpimarratu dute, eta erantsi hustea gazteei alternatibarik eskaini gabe egin dutela. Horiek horrela, beharrezkotzat jo dute hiri ereduari eta udalak gazteei eskaintzen dizkien alternatibei buruz eztabaidatzea. «Hiria gobernantza kooperatiboko eredu baten bidez eraiki beharko litzateke, bizilagunei eskua luzatuz».
