Nafarroako Justizia Auzitegi Nagusiak bortz urte eta sei hilabeteko kartzela zigorra ezarri dio gizon bati, 16 urteko adingabe bat bortxatzeagatik. Hala, Nafarroako Probintzia Auzitegiak ezarritako zigorrari urtebete eta hamar hilabete gehitu dizkio.
Sententziak dioenez, erasoa 2022ko martxoan gertatu zen, Erriberan: biktima, erasotzailea, beste emakume bat eta beste gizon bat etxebizitza batera joan ziren, eta laurek hainbat droga kontsumitu zituzten; ondoren, adingabea gaizki sentitzen hasi zen. Biktima eta erasotzailea bakarrik gelditu ziren etxean, bertze biak joan egin ziren eta. Orduan, gizonak adingabea bortxatu zuen, drogak kontsumitu zituela baliatuta.
Joan den azaroan, Nafarroako Probintzia Auzitegiak hiru urte eta zortzi hilabeteko zigorra ezarri zion, baina fiskaltzak eta akusazio partikularrak errekurtsoa jarri zioten erabakiari.
Atxilotu bat Donostian
Bestalde, Ertzaintzak 23 urteko gizon bat atxilotu zuen atzo Donostian, emakume bati sexu erasoa egitea egotzita. Segurtasun Sailak azaldu duenez, igande goizaldean gertatu zen erasoa, Aiete auzoan. Atxilotua emakumea bizi den ostatuko gelara joan zen, eta bertan egin zion eraso. Musuak eman eta sexu ukituak egin zizkion. Neskak ez zuenez harekin sexu harremanik izan nahi, gizonak iraindu egin zuen, eta gelatik alde egin zuen. Biktimak atzo jarri zuen salaketa Ertzaintzan, eta atzo bertan atxilotu zuten gizona.
