Ez dela behin ere saiatu bere buruaz beste egiten. Hori argi utzi nahi izan zuen Baionako erietxe publikoko mediku ohi Nicolas Bonnemaisonek atzo, Angersko krimen auzitegiko dei auziaren lehen egunean. 2010 eta 2011 urteen arteko Baionako gertakarietatik hona gertatuak gogoratuz hasi zen haren aurkako auzia. Zazpi pertsona pozoiturik hiltzeagatik da akusatua mediku ohia. Pauen, iaz iragan lehen auzian, epaimahaiak errugabe jo zuen.
Bonnemaisonek lehen hitzak hildakoen zazpi familiei egin zizkien. Harekin mintzatu nahi baldin bazuten, zerbaitetan laguntzen ahal bazituen, prest zegoela.
Ondotik, haren nortasunaren azterketa egin zuten. Bonnemaisonek berak azaldu zuen lehenik bere bizitza. Hazparnen iragan haurtzarotik hasi zen. Aita tokiko erietxeko buru zuela. Intimitate horretatik zenbait gai atera ziren. Nola haren aitak eta haren arrebak bere buruaz beste egin zuten. Nola Bonnemaison bera zainetarik ahul egona zen behin baino gehiagotan. Nerabezaroan, ikasle zela, Baionako erietxeko mediku arduradun zela. Lau lan urte orotara. Baina horiek guztiak esplikaturik, argiki gaitzetsi nahi izan zuen azken lau urte hauetan entzuten duen zurrumurru nagusia: «Bere buruaz beste egiten ahalegindu zen mutil hauskor bat nintzela entzun dut», esan zuen. Baina ez dela mutil hauskor bat eta ez dela saiatu bere buruaz beste egiten berretsi zuen. Krimen auzitegiko auziak horrela hasten direla beti, akusatuaren azterketa psikologo batekin. Ondotik, Andre Montaut nortasun ikerlaria mintzatu zen. Bonnemaisonek «sentitzen duen enpatiarekiko distantzia aski» ez duela adierazi zuen.
Azkenik, Julie Bonnemaison mediku ohiaren emaztea eta anestesista mintzatu zen. Senarraren profesionaltasuna nabarmendu zuen, zailtasunak gorde gabe.
Bonnemaisonen nortasunaren azterketarekin hasi dute auzia
Baionako erietxeko mediku ohia luzaz mintzatu da dei auziaren lehen egunean.Bere depresio garaiez justifikatu behar izan du bere burua
Iruzkinak
Ez dago iruzkinik
Ordenatu
