Bonnemaisonen aurkako dei auzia bihar hasiko da

Nicolas Bonnemaison Baionako erietxe publikoko mediku ohia berriz epaituko dute astelehenean hasi eta hamar bat egunez. Dei auzia da, bigarrena, baina lehena balitz bezala iraganen da. Hutsetik abiatuko da. Krimen auzitegian horrela iragaten dira dei auziak. Lehen erabakirik izan ez balitz bezala, alde batek dei egitea aski da. Ez da filtrorik. Kasu honetan, Ministerio Publikoak zuen dei egin.

Iazko ekainean, Paueko krimen auzitegiak errugabe jo zuen Bonnemaison. Baina Marc Mariee prokuradoreak ez zuen onartu erabakia. Aldi honetan, Pauetik Angersera (Pays de la Loire) eramanen dute auzia. Baionatik 5,5 oren bide. Bederatzi herritar arruntek osatu zinpeko epaimahaiak izanen du bere gain epaia.

Zazpi pertsona pozoiturik hiltzeaz akusatua izanen da berriz Bonnemaison. Zigor kodearen barne sartzen den akusazioa da. Kontua ez da erabakitzea Bonnemaisonek bizi bukaera legeztatzen duen Leonetti Legea errespetatu zuen ala ez. Gaia hilketa da. Hil ote zituen ala artatu ote zituen eriak. Angerseko auzian, hiltze horiek baieztatuz gero, bizi osoko presondegi zigorra arriska lezake Bonnemaisonek.

Hil diren zazpi pertsonen senideen gehiengoa ez da parte zibil gisa plantatu, baina, Iramuno familiakoak bai. Valerie Garmendia dute abokatuetako bat. Auzia hutsetik berriz hasteko perspektiba hori ez zaiela «erraza» azaldu du abokatuak. «Aski zaila zaie berriz ere istorio horretan sartu behar izatea. 2011n hil zitzaion ama. Geroztik denbora pasatu da. Baina dolua egitea ezinezkoa bihurtzen zaie gertakari hauekin». Halere, aitzineko epaimahaiaren erabakiarekin senideak ez zirela gustura gelditu zehaztu du abokatuak. «Zigor bat» espero dute aldi honetan. «Ez baitezpada hamabost urteko presondegi zigorra», abokatuaren hitzetan, baina bai «haren errua ezagutaraztea, nahiz zigorra sinbolikoa izan». Lehen auzia iraganik ere, senideei oraindik elementu anitz «ezin ulertuak» egiten zaizkiela argudiatu du Garmendiak. Auzian agertu informazio anitz «kontrajarriak» zaizkie. Haiekin ez hitz egin izana leporatzen diote bereziki Bonnemaisoni. Ez zela behin ere haiekin mintzatu esplikatu du abokatuak. «Prentsan ikusi zuten lehen aldiz. Ordu arte, ez zuten behin ere ukan haren berri».

Hiltzeko intentziorik ez

Iazko auzian, medikuak eriak artatu zituela erabaki zuen Paueko krimen auzitegiko epaimahaiak. Gaixo horien sufrimendua arintzeko asmoarekin zuela azken uneko sedazioa erabili. «Ez da frogatu injekzio horien bidez eriak hiltzeko intentzioa zuenik», epaimahaiaren ustez; Bonnemaisonek «fede onez» jardun zuela ere ebatzi zuen.

Prokuradoreak, berriz, bost urteko baldintzapeko presondegi zigorra eskatu zuen. Nahiz eta hark berak honela hasi zuen bere zigor eskaera egiteko hitzartzea: «Ez zara pozoitzaile bat. Ez zara hiltzaile bat». Baina, halere, kondenatzeko eskatu zuen. Bizia amaitzeko intentzio argia leporatu zion Bonnemaisoni. Horren frogatzat zeukan kurarea erabili izana, jakinez normalki kurarearekin hatsa lagundu behar dela makina baten bidez, eta hark ez zuela hori egin. Frogatzat zeukan,halaber, Hypnovel produktuaongi ez erabili izana. Emeki-emeki behar da injektatu, baina Bonnemaisonek kolpez zuela egin. Oro har, Bonnemaisonen ekintzak ez zirela «mediku ekintzak» izan zioen, baina bai «ekintza transgresiboak».

Dei auzitik landa, gelditzen den errekurtso bakarra kasazio gortea da. Baldin eta zuzenbide arauekin bat egiten ez duen erabakia bada.