Bonnemaison ospitaleko antolaketa «ahularen» biktima dela salatu dute

Nicolas Bonnemaison bere buruaz bertze egiten saiatu izanak hautsak harrotu ditu berriro ere, eta Baionako erietxeko mediku ohiaren aldeko ahotsak azaleratu dira. Haren aldeko sostengu taldeak salatu du, hain zuzen, ospitaleko antolaketa «ahularen» biktima dela Bonnemaison. Bertze hainbat faktore ere ezarri ditu «gertaturiko guziaren» arrazoien artean, hala nola, «lege hipokritak», instituzioen «itsukeria» eta «ingurune juridiko kontserbadore baten errabia».

Larunbatean saiatu zen Bonnemaison bere buruaz bertze egiten, eta geroztik larri dago, Pessaceko (Okzitania) erietxean. Haren osasun egoerak hobera egin zuela adierazi zuten ingurukoek atzo, baina gertakariak berak «triste, asaldaturik eta biziki haserre» jarri ditu sostengu taldekoak. Lotura zuzena egin dute suizidio saialdiaren eta medikuaren aurkako epaiketaren artean —bi aldiz epaitu dute, paziente batzuk pozoitzea egotzita—: «Medikuen Ordenako Kontseiluaren gisako lobby erlijioso, mediko-administratibo eta korporatibistek, ospitaleko konplot testuinguru batean, adibide gisa zigortu dute Bonnemaison. Baina guk haren adorea, izaera eta profesionaltasuna bilakatuko ditugu adibide».

Hitz gogorrok biltzen dituen oharra bidali zieten komunikabideei larunbat arratsean Baionako erietxeko hiru langilek, sostengu taldearen izenean: Françoise Lafaye erizain laguntzaileak, Jean Lastiri garraiolariak eta Cecile Lafitte psikiatrak. Lastirik oharrari buruzko azalpenak eman dizkio BERRIAri. Haren ustez, ospitaleko baliabide eskasiak eragina izan zuen duela lau urte Baionako erietxean gertaturikoan, eta Bonnemaisonen kondena zein mediku lanetik «baztertu» izana «ezin onartuzkoak» dira. «Aspaldiko urteetan salatzen dugu diru eskasa badugula ospitaleetan, eta horrekin, baldintza txarrak lan egiteko. Eriak arribatzen direlarik ospitalerat ez dakigu sobera zer egin gaur egun, hori da zinezko problema. Eta horrelako gauza batzuk gertatzen dira gero: ezin behar bezalako toki batean ezarriz, horrela gertatzen da».

Halere, Lastirik ez ditu ospitaleko langile eta zuzendaritzako kideak errudun egin nahi izan: «Haiek ere, hastetik salatu dutelarik, ez zekiten hein horretara arribatuko zirela. Ezin dugu guk ere akusatu nornahi nolanahika». Finean, legea mugatua dagoela uste dute sostengu taldeko kideek, eta hori aldatu ezean berriro gerta daitezkeela gisa bereko arazoak.

Bizitza bukaeran erien eskubideak hobetzeko lege bat eztabaidatzen ari dira hilabeteotan Frantziako Parlamentuan, preseski, baina Lastiriren ustez, ez da aski izanen. «Behar da lege azkar bat idatzi; ez orain egiten dutena: lege bat egiten dute, urte batzuen buruan artikulu batzuk kanbiatzen, ohartzen baitira ez direla onak... Baina artean Baionan pasatu diren bezalako gauza batzuk gertatzen ahal dira».

Auzi gastuentzat, diru bila

Bere onera etorriz gero, Bonnemaison berriro mediku gisa has dadila nahiko lukete haren aldeko sostengu taldekoek. Anartean, haren aurkako epaiketak eraginiko gastuak ordaintzen laguntzeko diru bilketa bat abiatuko dute laster. Izan ere, bi urteko espetxe zigorrera kondenatzeaz gain, Baionako mediku ohiari parte zibilei 30.000 euro ordaintzeko eskatu zion Angersko Krimen Auzitegiak. Lehenagotik martxan den izenpe bilketa ere berriro bultzatuko dute.