2022ko uztailaren 23an Ipar Euskal Herriko bide nagusiak blokeatu zituzten 2.000 bat herritarrek, Bakegileek deitutako ekintzetan parte hartuta. 26 pertsona atxilotu zituzten, eta hainbat auzibide ireki. Haietako bederatziren aurkako auzibidea irekia zen, baina aldeek akordioa egin dute, eta auzi itxitzat eman.
Trenbide sarea blokeatzea egotzita auzipetu zituzten, eta SNCFk interes zibilen auzia ireki zuen. Akordio «konfidentzial» bat egin dute, Bakegileek ohar bidez jakinarazi dutenez, eta, horrenbestez, auzia itxitzat eman dute.
Bake prozesua blokeatuta zegoela salatzeko dozenaka ekintza izan ziren. Hain zuzen, Jakes Esnal eta Ion Parot euskal presoen baldintzapean aske uzteko erabakiaren aurretik egin zuten protesta ekintza. 32 zeramatzaten preso, eta haiek askatzeko eskatu zuten protestetan.
