Bizkaiko andre bat desagertu da Panaman, eta Ertzaintza kasua ikertzen ari da. Eusko Jaurlaritzako Segurtasun Sailak jakinarazi duenez, familiak atzo jarri zuen salaketa: asteartetik ez zuten senitartekoaren berri, eta desagertzea ikertzeko eskatu zuten, arduratuta. 30 urte ditu emakumeak, eta Erandiokoa da.
Segurtasun Saileko iturriek jakinarazi dutenez, behin familiaren salaketa jasota, jakin zuten emakumea desagertu zen tokiaren inguruan hilotz bat agertu dela, eta orain ikertzen ari dira loturarik baden bi gertaeren artean. Carenero uhartearen inguruan agertu da hilotz hori, kostaldeko eremu batean, eta desagertutako andrea eskualde horretan zegoen ostatu hartuta.
Kasuaren kargu egin den Panamako auzitegiko fiskalak agindu du DNA laginak hartzeko hilotzari, identifikatu litekeen ikusteko. Ertzainak lankidetzan ari dira Panamako agintariekin, gorpua lehenbailehen identifikatzeko eta desagertzearen gainean argibideak lortzeko.
