Dori Monasteriok eta Ines Nunez de la Partek «terrorismoaren eta indarkeria politikoaren biktima guztiak omentzeko eta oroitzeko» espazioa zabaldu dute gaur, Bilbon, Guggenheim museoaren eta Euskadi plazaren artean. Monasterioren aita, Fermin, ETAk hil zuen, 1969ko apirilaren 9an; Nunez de la Parte, berriz, Francisco Javierren alaba da; Poliziak hil zuen, 1977ko maiatzaren 30ean. Ekitaldian izan dira Imanol Pradales Eusko Jaurlaritzako lehendakaria, Juan Mari Aburto Bilboko alkatea eta beste zenbait ordezkari eta eragile politiko.
Altzairuzko estruktura baten inguruan marmolezko bost bankuk osatzen dute espazioa. Jose Ramon Anda eskultoreak diseinatu du, eta Atalase deitu dio. Kontatu du «gogoetarako eta topaketarako» eremu bat sortu nahi izan duela, bakea helburu.
Pradalesek gaineratu du Atalase «memoria kritikoaren» isla dela eta «ispiluaren aurrean jartzen gaituela». Sakontzeko deia ere egin du, eta gizarteari eskatu dio iragana «konplexurik gabe, diskriminaziorik gabe eta ahanzturarik gabe» kontatzeko, «itzulinguruka ibili gabe». «Bizi izan genuena transmititzea gure erantzukizuna da, datozen belaunaldien geroa dugu jokoan; izan ere, bere historia ezagutzen ez duen gizartea iraganeko akats berak errepikatzera kondenatuta egon daiteke», gaineratu du.
