Arabako foru gobernuak babesa behar du aurrekontuak onartzeko, eta oposizioko hiru alderdi nagusiak prest daude akordioren bat lortzen saiatzeko, nor bere baldintzak ezarrita. EH Bildu da oposizioburua, eta Eva Lopez de Arroiabek jakinarazi du prest daudela negoziatzen segitzeko: «Akordioari aterik ez ixtea da xedea».
Etxebizitza, zahar etxeetan egoiliarrentzako leku publikoak sortzea, trantsizio ekosoziala eta udalen finantzaketa dira EH Bilduk indartu nahi dituen ardatz nagusiak. Hau da, prest da negoziatzen segitzeko lau ardatz horietan indar handiagoa egin dadin Arabako foru gobernuak proposatutako aurrekontuetan: «Alderdi horiek hobetzeko lanean jarraituko dugu. Hainbat bilera egin ditugu jada, eta hainbat dokumentu trukatu; beraz, gure borondatea da orain arte bezala negoziatzen jarraitzea».
PPk eta Elkarrekin taldeak ere aurkeztu dituzte zuzenketak.
