EH Bilduk, EAJk eta, PSE-EEk Gipuzkoako Hondakinen Kontsortzioaren (GHK) gobernu organoa adostu dute gaur. Jose Ignazio Asensio (PSE-EE) hautatu dute presidente berriz ere, eta Jon Ander Azpiroz (EAJ) presidenteorde. 2015etik lehen aldiz, EH Bilduk hiru ordezkari izango ditu administrazio kontseiluan: Ion Arozena, Eñaut Gracia eta Alaitz Labaien.
«Aro berritzat» jo du egungoa Asensiok, eta zaborraren kudeaketa normalizazio fase batean sartzen ari delakoan dago, «horrenbeste urte gatazkan egon ondoren».
EH Bilduk irabazi zituen maiatzaren 28ko udal eta foru hauteskundeak Gipuzkoan, eta, horren arabera, GHKn %38,1eko ordezkaritza du, zortzi mankomunitateetako boto haztatua aintzat hartuz gero. Mankomunitateetako eta diputazioko zenbait ordezkarik osatzen dute erakundea.
EH Bilduk esan du «fiskalizazio lanak» egingo dituela eta «gardentasun printzipioa» arretaz zainduko duela kontsortzioan. «Ezinbestean EH Bildurekin adostu beharko da Gipuzkoako hondakinen kudeaketa integrala herrialdean».
Aste honetan Nafarroako Gobernuak parlamentuan adierazi du Artaxoan Zubietako erraustegiko behar bezala kodifikatu gabeko hondakin likidoak jasotzen ari direla. Horren berri jaso ostean, EH Bilduk adierazi du eskaera egingo duela urtarrileko Batzar Nagusietako osoko bilkuran eta GHK-ko administrazio kontseiluan informazioa eman dezaten.
