50 hizkuntza gutxitutako ordezkariak dira, 25 estatutakoak, 175 erakundetan dabiltzanak: Europako hizkuntza gutxituen aldeko eragile sozialen sare ELENeko kideak dira, eta Bilbon egiten ari dira urteko batzarra, Itsasmuseumen. Abian da topaketa, eta bihar jarraituko du.
Gaur 14:30ean izan da sarrera. ELENeko lehendakari Elin Haf Gruffydd Jones, idazkari nagusi Davyth Hicks eta Euskalgintzaren Kontseiluko idazkari nagusi Idurre Eskisabel izan dira lehen solaskideak. Ondoren, ikerketari eta aktibismoari buruzko hainbat hitzaldi izan dira.
Bihar izango da inaugurazio ofiziala, 09:00etan, eta, ELENeko ordezkariez gain, bertan izango dira Europako Parlamentuko bi ordezkari ere: Pernando Barrena, EH Bildukoa, eta Oihane Agirregoitia, EAJkoa. Ondoren, hizkuntza politiken hainbat esperientzia aztertuko dituzte. 10:50 aldera talde argazkia egingo dute, eta prentsaren aurreko agerraldi bat: urtearen balorazioa eta aldarrikapenak egingo dituzte.
EB Europako Batasunean hizkuntza gutxituen ofizialtasuna aitortzea da egun mahai gainean dagoen aldarrietako bat. Iaz, Sardinian egin zuten urteko batzarra ELENeko kideek, eta mintzagai nagusietako bat horixe izan zen. Horren aldeko mezua plazaratzeko, iazko irailean bat egin zuten Bruselan sareko ordezkariek, euskara, galiziera eta katalana ofizial egiteko Espainiako Gobernuak egindako eskabidearen harira.
