Bilboko Etxarri gaztetxea hustu aurretik, ertzainek hartu dute ingurua

Gutxienez zazpi furgonetarekin oztopatu dute eraikinaren sarrera. Gaztetxeko kideek bertaratzeko deia egin diete herritarrei. Manifestazioa egin dute 20:30ean, eta ertzainek kargatu egin dute gazteen aurka

Ertzaintzaren furgoneta ugari Bilboko Etxarri II gaztetxera joan dira gaur arratsaldean. ETXARRI II GAZTETXEA
Ertzaintzaren furgoneta ugari Bilboko Etxarri II gaztetxera joan dira gaur arratsaldean. ETXARRI II GAZTETXEA
Olatz Silva Rodrigo.
2025eko apirilaren 3a
20:05
Entzun 00:00:0000:00:00

Bihar hustu nahi dute Bilboko Errekalde auzoko Etxarri II gaztetxea. Hala ere, Ertzaintza gaur arratsaldean joan da bertara, eta gutxienez Poliziaren zazpi furgonetak gaztetxearen sarrera oztopatu dute. Gaztetxeko kideek dei egin diete herritarrei, bertaratu daitezen. Hustea salatzeko, manifestazioa egin dute gaur 20:30ean, Errekaldeko osasun zentrotik abiatuta. Ertzaitzak kargatu egin du gazteen aurka. Lekukoen arabera, foam balak ere erabili dituzte.

Sare sozialetan eskegitako bideo batean, ertzainak ikus daitezke ondoko eraikinaren teilatuan ere. «Kautelazko neurri gisa jarri omen dute Poliziaren dispositiboa; bihar goizera arte geratuko direla adierazi dute», salatu dute gaztetxeko kideek. Atzo ere bertaratu ziren ertzainak, baina alde egin zuten gero.

Duela hilabete iritsi zitzaien gaztetxeko kideei husteko agindua: apirilaren 4ko 09:00etarako, hain justu. Ordutik, hainbat deialdi antolatu dituzte. Besteak beste, elkartasun egitaraua egin zuten martxoaren 22an, eta joan den ostiralean manifestazio jendetsua egin zuten auzoan.

2014an okupatu zuten Etxarri gaztetxea. «Kukutza III-ren eraispenaren ondorioz auzoko gazte langileok izan genituen beharrei erantzun kolektibo bat emateko helburuz», gogoratu zuten joan den hilean. Urte hauetan, hitzaldi, erakusketa, jaialdi eta batzar ugari antolatu dituzte. Are gehiago: «Etxarri bestelako aisialdi eredu bat garatzeko espazioa izan da, gazteon sozializazio eta politizaziorako gunea, eta auzoko hainbat eragilerentzako aterpea».

Erantzule «zuzenak»

Kideen arabera, husteak erantzule «zuzenak» ditu. Hasteko: «Gaztetxearen etorbidean egitekoak diren proiektu urbanistiko elitistarekin poltsikoak beteko dituzten enpresariak». Horrez gain, Bilboko Udalari leporatu diote proiektu horren «bultzatzaile nagusia» izatea, eta epaileei eta Poliziaren indarrei egotzi diete husteko aginduaren erantzule izatea.

«Polizia Etxarri husten saiatuko da, eta, horrekin, hamar urte baino gehiagoz Errekaldeko hainbat gazte belaunaldik garatu dugun proiektua suntsitzen ahaleginduko dira», adierazi zuten duela hilabete. Horren aurrean, argi utzi zuten euren «arma bakarrak antolakuntza eta borroka» direla. Hori dela eta, elkartasunerako deia egin zuten. Besteak beste, auzoko eta inguruko 60 eragilek, komertziok eta hogei artista inguruk husteko agindua bertan behera uzteko aldarrikatu dute adierazpen baten bitartez.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Kazetaritza propio eta independentearen alde, 2025 amaierarako 3.000 irakurleren babes ekonomikoa behar du BERRIAk.