Nafarroako Auzitegiko Lehen Sekzioak bi urte eta sei hilabeteko espetxe zigorra ezarri dio gizon bati Iruñean, alabari 13 urte zituenetik behin eta berriz ukituak egiteagatik. Epaileak frogatutzat jo du gizonak haurraren ama etxean ez zegoela aprobetxatzen zuela alabari ukituak egiteko, eta hark 13 urte zituenean hasi zitzaiola aita ukituak egiten. Egun, 16 urte ditu neskak.
Bi urte eta sei hilabeteko espetxealdia ez da izan gizonari ezarri dioten zigor bakarra. Fiskaltzak, akusatuak eta defentsak lortutako akordioaren arabera, gizona ezin izango da biktimarekin komunikatu, eta 200 metroko urruntze agindua ezarri diote zazpi urtez. Horrez gain, espetxetik irtetean zaintzapean egon beharko du aske, bost urtez, eta alabari 1.000 euroko kalte ordaina eman hari eragindako kalte moralagatik.
Gainera, akordioak eta Probintzia Auzitegiak erabakita, alabaren zaintza galdu du sei urtez.
