Birziklatze lantegi batek su hartu du Erandioko Asua industrialdean (Bizkaia), eta bi langile artatu behar izan dituzte kea arnasteagatik. Langileetako bat Gurutzetako ospitalera eraman dute (Barakaldo, Bizkaia), eta bestea sutea izan den inguruan bertan artatu dute osasun langileek.
Sutea 08:00 aldera piztu da. Lantegian pilatutako txatar multzo batek hartu du su, eta Eusko Jaurlaritzako Osasun Publikoko Zuzendaritzak inguruan bizi diren herritarrei gomendatu die etxeko ateak eta leihoak ixteko, suteak «ke laino handia» eragin duela eta. Gomendio hori bertan behera utzi dute 14:00etarako.
Suhiltzaileek sua kontrolpean hartu dute goizean, eta sutea 11:00 aldera itzaltzea lortu dute. Larrialdi zerbitzuek bertan jarraitu dute lanean, kaltetutako eremua hozteko.
