Espainiako Poliziak bi gizonezko atxilotu ditu Iruñerrian, adingabe bati sexu erasoak egitea leporatuta. 22 urte ditu batek eta 24 urte besteak. Urrian jazo zen erasoa, Iruñeko Arrotxapea auzoko etxebizitza batean, baina gaur eman dute atxiloketen berri, ohar bidez.
14 urteko neska batek Poliziari kontatu zionez, gizonezkoetako batekin hitzordu bat adostu zuen, sare sozialen bitartez mezuak elkarri idatzi ostean. Elkartu zirenean, gizonezkoa sexu jarduera zenbait egin nahian hasi zen. Neskaren oniritzirik ez zuen jaso, eta, gizonezkoari gelditzeko eskatu arren, ez zion kasurik egin. Hala, sexu erasoa egin zion. Are, bigarren gizonezko bat ere batu zen erasora, ukituak eginez.
Emakumezkoak ez zituen erasotzaileak ezagutzen, ez zekien ez non bizi ziren, ez non lan egiten zuten. Poliziak azaldu du hori ikerketarako oztopo izan dela. Azaldu dutenez, ikerketan Espainiako Poliziaren atal zientifikoak eta Familia eta Emakumea Zaintzeko Unitateko kideek parte hartu dute, salatutako delituaren izaera eta gertakarien biktimaren adina kontuan hartuta. Iruñeko 4. epaitegiak aginduta egin dute.
Epaileak urruntze agindua ezarri die gizonezkoei, behin-behinean.
