Espainiako Espetxe Erakundeek bertze hiru euskal presoren mugimenduen berri eman dute gaur: bi euskal preso Euskal Herriratu eginen dituzte, eta bat hurbildu eginen dute. Euskal Herriratuko dituztenetako bati, gainera, hirugarren gradua eman diote: Irkus Badillo Borderi, hain zuzen.
Badillo Borde Basaurira ekarriko dute, Fontcalentetik (Herrialde Katalanak, 745 kilometro). Kartzela horretan zegoen azken euskal presoa zen Badillo Borde, eta, beraz, hura mugitutakoan euskal presorik gabe geldituko da Alacanteko kartzela hori. Badillo Borde 2004ko martxotik dago kartzelan, eta, hogei urteko kartzela zigorra izanik, 2019ko otsailean bete zituen hiru laurdenak.
Euskal Herrira ekarriko duten bertze presoa Aurken Sola Campillo da: Burgostik (Espainia, 215 kilometro) Iruñera ekarriko dute. 2008ko azarotik dago Sola espetxean, eta hogei urteko zigorra du: 2023ko urrian beteko ditu hiru laurdenak.
Hurbilduko duten presoa Mikel San Sebastian Gaztelumendi da: Murtzia IItik (Espainia, 820 kilometro) Soriara mugituko dute (Espainia, 260 kilometro). 2008ko apiriletik dago preso, eta 56 urteko zigorra du. Hurbiltzeaz gain, bigarren gradura ere pasatuko dute San Sebastian.
Puerto I, jada hutsik
Etxerat-ek jakinarazi duenez, bertzalde, aitzinetik iragarritako sei mugimendu gauzatu dituzte asteon Espainiako Espetxe Erakundeek: Fernando Elejalde Tapia Puerto I espetxetik (Andaluzia, Espainia, 1.020 kilometro) Mansillako espetxera (Espainia, 370 kilometro) eraman dute; Juan Carlos Besance Zugasti, Huelvako espetxetik (Andaluzia, Espainia, 1.000 kilometro) Dueñasko espetxera (Espainia, 310 kilometro); Garikoitz Etxeberria Goikoetxea, Sevillatik (Andaluzia, Espainia, 990 kilometro) Dueñasera; Lorenzo Aiestaran Legorburu, Villenako kartzelatik (Herrialde Katalanak, 700 kilometro) Soriara; eta, Bea Etxebarria, Aranjueztik (Madril, 520 kilometro) El Duesora (Espainia, 170 kilometro). Idoia Mendizabal Mujika presoa, berriz, Picassentetik (Herrialde Katalanak, 600 kilometro) Iruñera ekarri dute.
Mugimendu horiekin, eta, iragarri bezala, jada ez dago euskal presorik Puerto I espetxean. Puerto IIIn oraindik bortz euskal preso daude.
