Bi emakume atxilotu ditu Espainiako Poliziak Barakaldon (Bizkaia). Emakumezkoak sexu esplotaziorako salerostea egotzi diete. Biktima batek —30 urteko emakume batek— salatu du egoera: Kolonbiatik ekarri zuten bizi baldintza hobeak izango zituela aginduta, eta Barakaldoko etxebizitza batean itxita eduki zuten hiru hilabetez. Bertan, prostituzioan aritzen zen atxilotutako bi emakumeek behartuta. Egun batean, bezero baten laguntzarekin, ihes egitea lortu, eta salaketa jarri zuen. Atxilotuetako bat L.M.C. da, 34 urtekoa; bestea G.M.C. da, 22 urtekoa.
Poliziak ohar baten bidez jakinarazi duenez, atxilotutako bi emakumeak talde antolatu bateko kideak dira. Talde horrek ekarri zuen biktima Kolonbiatik, eta 5.000 euro eskatu zizkion trukean. Hala, biktimak zorra egin zuen taldearekin. Prostituzioan aritzera behartuta lortzen zuen diruaren %40 hartzen zuten. Poliziaren arabera, beste emakume batzuk ere egoera berean eduki dituzte. Atxilotutakoak libre utzi ditu poliziak, baina karguekin.
