Noaingo (Nafarroa) Zabalegiko Kontzejua kaleko eta Lostra hiribideko hainbat eraikin berriro hutsik geratu dira arratsaldean. Bizilagun batek gas usaina aditu duela ohartarazi die larrialdi zerbitzuei, 17:34an. Berriro ere gas isuria izan zitekeela-eta, beldurrez, bertan bizi diren bizilagunetako batzuek etxetik alde egin dute euren borondatez.
Astelehen arratsaldean gas leherketa bat izan zen bertan, eta oraindik familia batzuk etxera itzuli ezinik daude. Bederatzi zauritu izan ziren leherketa hori zela eta. 120 etxebizitza hustu zituzten orduan, eta asteazkenean 120 horietatik 80k etxera itzultzeko baimena jaso zuten.
Gaur berriro atera izan behar dute, gas usaina aditu dutelako. Nahiago izan dute etxea utzi, adituek arriskurik ez dagoela egiaztatu arte. Larrialdi zerbitzuak eta gas konpainietako langileak bertara joan dira zehazteko antzeman duten usain hori benetan gasa den edo ez, eta, hala balitz, zergatik gertatu den. Adituek probak egin dituzte, eta guztiek negatibo eman dute. Beraz, egiaztatu ahal izan dute ez zegoela arriskurik.
Sebastian Marco Noaingo alkateak baieztatu du ez dagoela gas isuririk. Haren ustez, asteleheneko eztandaren ostean, «erabat normala eta ulergarria da» bizilagunen asaldura.
