Bere burua hiltzen saiatu, eta oso larri dago Bonnemaison

Autoaren ihes hoditik ateratzen den gasaren bidez itoz, bere buruaz beste egiten saiatu zen atzo Nicolas Bonnemaison Baionako larrialdietako mediku ohia, Sud Ouest egunkariak jakinarazi zuenez. Tosse (Landak) herriko oihanean aurkitu zuten bi korrikalarik. Geldirik eta motorra martxan zuen autoak jakin-mina sortu zien. Hara hurbildu, eta ohartu ziren mediku ohia barnean zegoela. Iturri beraren arabera, erremedioak hartu ahal izan zituen. Lerrook idaztean, atzo iluntzean, koman zegoen Bonnemaison, Bordeleko erietxean. Idatzi bat aurkitu zuten autoan jendarmeek, Sud Ouest-en arabera; lau urte iraun bere aurkako prozedura aipatzen zuen, baita dei auzia ere.

Izan ere, haren aurka iragan bi auziak berriz ekarri ditu gogora gertakariak. Hiltzear ziren gaixoei pozoia emanda, zazpi lagun hil izana leporatu zioten, eta Angersko (Frantzia) dei krimen auzitegiak bi urteko baldintzapeko kartzela zigorra ezarri zion duela zortzi egun, bi aste iraun auzitik landa. Iaz, Paueko krimen auzitegiak errugabe jo zuen, baina helegitea jarri zuen prokuradoreak. Azkenean, heriotza bakarragatik, Françoise Iramunoren kasuagatik zigortu zuen dei auzitegiak. Emazte horren sendia akusazio gisa aurkeztu zen epaiketan. Gainerateko heriotzengatik errugabe jo zuten. Epaimahaiak azpimarratu zuen familiak berak ez zirela akusazio gisa aurkeztu. Kasazio gortera ez jotzea erabaki zuten Bonnemaisonen abokatuek.

Bi auzietan aipatu zen bizitza osoan depresio faseak izan zituela mediku ohiak. Haren «ahuldura psikologikoa» nabarmendu zuten, baita haren aitak nahiz arrebak bere buruaz beste egin zutela ere. Gertakarien garaian depresioaren aurkako erremedioak hartzen zituen Bonnemaisonek. Baina 2011n Bonnemaison atxilotu zutelarik harekin bildu zen Roland Coutanceau psikiatra adituak baieztatu zuenez, «depresioaren testuinguruak ez zuen deus ikustekorik». Haren hitzetan, medikuak ez zuen «buruko nahasmenik», ez eta «pertsonalitateari lotu eritasunik» ere.

Aldi berean, 2013an, mediku ordenatik kanporatu zuten. Hori biziki gaizki eraman zuela aitortu zuen mediku ohiak.