Atzo hil zen Begoña Arregi, Juan Jose Ibarretxe Eusko Jaurlaritzako lehendakari ohiaren emaztea. Udan atzeman zioten gaitz baten ondorioz zendu da. Laudioko Larrazabal auzoan (Araba) jaioa zen, 1958. urtean, eta bi alaba zituen. Altzairu enpresa batean jardun zuen lanean hainbat urtez, administrazio lanetan.
Sare sozialetan Joseba Azkarraga Sare Herritarreko bozeramaileak eman zuen albistea lehenik, Ibarretxeren garaian Eusko Jaurlaritzako sailburu izandakoak: «Inoiz ez bezala zurekin nago, Ibarretxe lehendakaria. Inoiz ez dugu bere irribarrea eta alaitasuna ahaztuko».
Berehala heldu ziren erreakzio gehiago. Andoni Ortuzar EBB Euzkadi Buru Batzarreko presidenteak doluminak eman zizkien Ibarretxeri eta haren alabei. «Begok bazekien bigarren planoan egoten baina konpromiso abertzale argi batekin», idatzi du. Arregi gogoan izan dute, besteak beste, Imanol Pradales Jaurlaritzako lehendakariak, Arnaldo Otegi EH Bilduko koordinatzaile nagusiak eta Carlos Iturgaiz EAEko PPko buru ohiak.
Kataluniako ordezkari politiko ugarik ere helarazi dizkiote doluminak Ibarretxeri, esaterako, Carles Puigdemont eta Quim Torra Generalitateko presidente ohiek eta Jordi Turull JxCateko idazkari nagusiak.
