Etxerat elkarteak jakinarazi duenez, Jon Etxeberria euskal presoa baldintzapean aske geratu da, Espainiako Auzitegi Nazionaleko Espetxe Zaintzako Epaitegi Zentralak hala ebatzita. Azken urtean etxean egin du preso.
Etxeberriak hamahiru urte egin ditu preso. 2012an atxilotu zuen Frantziako Poliziak, eta zortzi urteko espetxe zigorra ezarri zioten 2014an. Ondoren, bederatzi urteko zigor bat ere ezarri zion Espainiako justiziak. 2021eko abuztuan iragarri zuten Espainiako Espetxe Erakundeek preso gasteiztarra Euskal Herriratuko zutela; Duesotik Zaballara (Araba) mugitu zuten. 2023ko irailean, berriz, hirugarren gradua ezarri zioten. Iazko otsailetik etxean ari zen zigorra betetzen, kontrol telematikoarekin.
