«Tentsioa sortuko dugu, arreta erakartzeko». Horrela azaldu du Anaiz Funosas Bake Bideko presidenteak uztailaren 23rako aurreikusi duten ekintza. Ipar Euskal Herria blokeatuko dutela iragarri dute Bakegileek, euskal presoen gaian aitzinamenduak lortzeko. «Prozesuaren blokeo judizial eta politikoari blokeo geografiko batekin erantzunen diogu». Egun osoan eta lurralde osoan iraunen duen ekintza hori «erabakigarria» izanen da, Funosasen hitzetan. Bide nagusiak «geldirik» egonen direla erran du. «Ehunka pertsona mobilizatuak dira jadanik, blokeo hori antolatzeko».
Luhusoko plazan (Lapurdi) elkartu dira Bakegileak, hilabete baten buruan egin gogo duten ekintza aurkezteko. Ipar Euskal Herriko hainbat pertsona ezagunek parte hartu dute, eta blokeorako erabiliko duten materiala ere erakutsi dute: traktoreak, adreiluzko paretak, bidoiak...
Jon Parot eta Jakes Esnalen egoerak aipatu ditu Anaiz Funosasek Frantziako Estatuarekin duten blokeoa irudikatzeko @berriapic.twitter.com/7OXr3JaOCd
— Ekhi Erremundegi (@EkhiErremundegi) June 23, 2022
Ion Paroten eta Jakes Esnalen baldintzapeko askatasun eskaerei emandako erantzunek eraman dituzte uztailaren 23ko ekintza erabakitzera. Behin eta berriz ezeztatu edo atzeratu dituzte, besteak beste, terrorismoaren kontrako fiskaltzak ezarritako helegiteengatik. Uztailaren 21ean aztertzekoak dituzte, beste behin, bi euskal presoen eskaerak. «Epe laburrera askatzeko aukera guziak baztertzeko borondate horrek justiziatik biziki urrun diren motibazioak erakusten ditu, [Frantziako] Estatuaren mendekuarenak», adierazi du Funosasek. «Frantziako estatuburuaren isiltasunak gatazkaren konponbide integrala ekarri behar duen Aieteko Konferentzian markaturiko ibilbide orria bukatzeko aukera guztiak ixten ditu». Eman beharreko pausuak zerrendatu ditu: preso eta erbesteratu guziak askatu eta etxeratzea, justizia trantsizionala ezartzea, biktima guziak onartzea «beren eskubideak bermatuko dituzten mekanismoak sortuz, inplikaturiko alderdi guzien arteko elkarrizketa plantan ezarriz eta gatazkaren iturriak identifikatuz».
Ipar Euskal Herria gelditu nahi dute Bakegileek. "Determinazio osoz" arituko direla erran du Funosasek @berriapic.twitter.com/VsRCbm7j69
— Ekhi Erremundegi (@EkhiErremundegi) June 23, 2022
Uztailaren 23rako hamar hitzordu ezarriko dituzte Bakegileen ekintzan parte hartuko dutenentzat. Aitzitik, herritar guziei informazioa bidaliko dietela iragarri dute, «aitzinetik antola daitezen eta egun horretan bideetan ibiltzea saihets dezaten», adierazi du Funosasek.
