34 urteko gizon baten bila ari dira Baionan. François-Tanguy Olivon bretoia eta haren emazte Manon Olivon Euskal Herrian ziren oporretan, lagun batzuk bisitatzen, baina gizona desagerturik dago ostiral gauetik. Emazteak France Bleu irratian azaldu duenez, Olivon lagun batekin joan zen Baiona Ttipira, eta telefono dei «kezkagarri» bat egin zion 01:00ak aldera: «Esan zidan eraso egin ziotela. Laguntza eske ari zen, baina telefono deia eten egin zen bat-batean».
Ordutik, gizonaren bila ari dira dozenaka boluntario, suhiltzaileak eta Frantziako Polizia. Hain zuzen, Poliziak jakinarazi du bideozaintza kamerek grabatutako irudietan Olivion ikus daitekeela Baiona eta Baiona Ttipia lotzen dituen Santizpiritu zubiko hesia zeharkatzen eta ibaira erortzen. Desagertutako gizonaren familiak onartu du hura bizirik topatzeko aukera «gero eta urriagoa» dela, eta Frantziako Poliziak ere hiltzat jo du jada. Suhiltzaileak Aturri ibaia miatzen ari dira, gorpuaren bila.
