Espainiako Auzitegi Nazionaleko Zigor Salak Iratxe Sorzabal absolbitu du, esanez ez dagoela baieztatzerik 1995ean hark jarri zuela lehergailua Alacanteko aireportuan (Herrialde Katalanak). Epaiketan, haren aurkako «froga sendo» bakarra ustez Sorzabalek ETAren zuzendaritzari bidalitako gutun bat izan zen, baina, epaimahaiaren arabera, ez dago baieztatzerik hura Sorzabalek idatzi zuela.
Martxoaren 17an eta 18an epaitu zuten Sorzabal, 1995ean Alacanteko aireportuko zaborrontzi batean lehergailu bat uztea egotzita. Epaiketan, euskal presoak adierazi zuen inkomunikazio aldian eta torturapean hartu zituela bere gain ETAren zenbait ekintza, tartean Alacanteko hura. «Polizia deklarazioa egiten ez banuen, okerrago izango zen, eta ezin nuen gehiago», esan zuen, eta ukatu egin zuen berak inolako zerikusirik izatea.
Epaimahaiak ez die erreferentziarik egiten Sorzabalek salatutako torturei, baina bai adierazten du polizien aurrean egindako adierazpen horiek ezin direla froga gisa erabili, han jasotakoak ukatu egin baitzituen epailearen aurrean.
Fiskaltzak ez zuen froga gisa erabili deklarazio hura, baina bai egin zizkion zenbait erreferentzia, argudiatzeko ustez Sorzabalek espetxetik ETAren zuzendaritzari bidalitako gutun bat froga baliagarria zela baieztatzeko egilea Sorzabal bera zela. Hala, sei urteko espetxe zigorra eskatu zuen harentzat.
Epaimahaiaren arabera, baina, dokumentu hori ere ezin da erabili Sorzabal zigortzeko, eta, ondorioz, bien arteko alderaketak alferrikakoak dira. Argudiatu du hura dela fiskaltzak aurkeztutako «froga sendo» bakarra, baina ez dagoela baieztatzerik auzipetuak idatzi zuela. Hain zuzen, fiskalari kritikatu dio hura Sorzabalena zela besterik gabe ontzat jotzea. Zergatik? Fiskaltzak ez zuelako froga gisa aurkeztu haren inguruko kaligrafia txostena, nahiz eta hura instrukzio fasean baliatu zuten. Era berean, gogoratu du Sorzabalek epaiketan ukatu egin zuela berak idatzi izana, eta Aiert Larrarte defentsa abokatuak ere propio inpugnatu zuela froga gisa.
Beste txosten bat erabili ez izana ere kritikatu du. Epaimahaiaren esanetan, txosten hartan ETAren Ibarlakomandoaren nondik norakoak jasotzen ditu, eta Poliziak Frantzian aurkitutako dokumentazioarekin alderatzen. Uste dute txosten horrek balioko zukeela egiletzaren ingurukoak argitzeko.
Otsailaren amaieran, 1995. urtean Irunen (Gipuzkoa) izandako atentatu bat egotzita ere epaitu zuten Sorzabal, eta haren ebazpena argitzeke dago. Kasu hartan ere, fiskaltzak erabilitako froga bakarra euskal presoari egozten dion gutun hori da.
Sorzabal 2015etik dago preso. Zazpi urte egin zituen Frantziako kartzeletan, eta handik irakurri zuen ETAren amaieraren berri eman zuen mezua. 2023an, baina, Espainiaratu egin zuten. 2020an, lehen euroagindu bati muzin egin zion Parisko Dei Auzitegiak, tortura testigantzei sinesgarritasuna emanda, baina, gero, onartu egin zuen, eta 2022an 24 urteko espetxe zigorra ezarri zion Auzitegi Nazionalak, ETAk 1996an Gijonen (Espainia) eginiko atentatu bat leporatuta. Orduan ere, dokumentu bera izan zen Sorzabalen kontrako froga nagusia. Kontuan hartu behar da, Poliziak gaztelerara egindako itzulpenean ageri ez den arren, gutun horren euskarazko bertsioaren hasieran ondorengo esaldia ageri dela: «Gero kontatuko dizuet nola atera zizkidaten gauzak, eta nola igaro ziren bost egun horiek. Hau da txakurrei esan nien guztia».
