2023ko uztailaren 26an, Baionako besten lehen egunean, Patrice Lanies baionarra bere etxera zihoan gauean. Etxera sartzen ari zela, gizon bati kargu hartu zion, eraikinaren sarreran pixa egiten ari zelako. Orduan, zenbait lagunek Lanies jipoitu egin zuten. Konortea galdu zuen, eta Baionako ospitalera eraman zuten; koma artifizialean egin zituen hainbat egun, eta abuztuaren 3an hil zen.
Zazpi lagun atxilotu zituzten Laniesen hilketagatik, sei gizon eta emakume bat. Horietatik bat, hilketaren susmagarri nagusia, behin-behineko espetxealdian zegoen, baina Paueko Apelazio Auzitegiak aske utzi zuen atzo, kontrol judiziala izateko betebeharrarekin, Sud Ouest egunkariak jakinarazi duenez. Haren abokatuak asteartean egin zuen aske uzteko eskaera; fiskaltzak, berriz, preso jarrai zezala eskatu zuen. Aske uzteko eskaera bat atzera bota zuten maiatzaren 16an.