Ertzaintzak 24 urteko gizon bat atxilotu du bart gauean, Durangon, adin txikiko emakume bat bortxatzeagatik. Durangoko epaitegitik igaro ondoren, aske utzi dute arratsaldean. Sexu erasoa egin izana egozten diote.
Udalak adierazpen bat kaleratu du esanez horrelako gertakariak ezin direla gertatu ez Durangon eta ez beste inon. "Nazkatuta gaude horrelako berriez, eta, kasu honetan, Durangon gertaturik, udalak eskain ditzakeen baliabide eta babes guztiak eskainiko dizkiogu biktimari", ziurtatu dute. Esan dutenez, dagoeneko martxan jarri dute halako gertaeretarako prestatuta daukaten protokoloa, eta hor jasotzen diren pausoak emango dituzte. "Horrelako gertakariek sorrarazten dizkiguten kezketatik abiatuta, udal gobernu honek bere esku dagoen guztia egingo du behingoz indarkeria matxista desagerrarazi eta gizarte hau gizaki guztiekiko errespetuan hezteko", nabarmendu dute. Horrez gain, gertakari honen harira sor daitezkeen mobilizazioetan parte hartzera animatu dituzte herritarrak.
Ez da aste honetako genero indarkeria kasu bakarra. Astelehen goizaldean, Ertzaintzak 51 urteko gizon bat atxilotu zuen Donostian, bikotekideari sexu eraso bat egitea egotzita. Donostiako Udalak elkarretaratze bat egin zuen atzo, gertatutakoa salatzeko.
Barakaldon (Bizkaia) ere 20 urteko gizon bat atxilotu zuten atzo, bikotekideari sexu eraso bat egitea leporatuta. Emakumeak larrialdietara deitu zuen, eta Ertzaintzak etxebizitzaren patioan aurkitu zuen, lepoan eta aurpegian kolpeak zituela.
