Epaileak aske utzi ditu Durangon (Bizkaia) emakume bati sexu eraso bat egitea egotzita atxilotu zituzten bi gizonak. Erasoa larunbat goizaldean gertatu zen, Askatasunaren Etorbidean: emakumeak berak jakinarazi zien poliziei sexu eraso baten biktima izan zela. Orduantxe atxilotu zituen Ertzaintzak 19 urteko gizon bat eta 45 urteko beste bat.
Bi gizonek polizia etxean igaro zuten gaua, eta atzo goizean eraman zituzten epailearen aurrera. Epaileak aske uztea erabaki zuen.
Ikusi gehiago
Elkarretaratzea
Durangoko Autodefentsa Feminista Asanbladak elkarretaratzera deitu du gaur 19:00etarako, Andra Mari kalean, Erasorik ez erantzunik gabe! lelopean.
Durangoko Udalak «erabateko gaitzespena» adierazi zuen atzo, adierazpen instituzional batean, eta biktimari babesa eta elkartasuna helarazi zizkion. Gaineratu zuen biktimaren esku jarriko dituela halako kasuetarako dituen zerbitzu espezializatuak, eta prozedura judizial eta administratiboetan laguntza emateko prest agertu zen.
