Asiron: «Eskuineko gobernuaren alternatiba lortzeko bidea abiatu dugu»

Miren Zabaleta EH Bilduko Nafarroako koordinatzaileak adierazi duenez, Iruñeko Udalean aurkeztutako zentsura mozioa PSNk eta EH Bilduk Nafarroan egindako akordioaren ondorioa da, eta bi indar politikoek hiriaren egoeraz egiten duten diagnostikoa du oinarri. Haren hitzetan, bi alderdiak ados daude UPNren gobernuarekin hiriak «blokeoa» bizi duela, eta uste du horren erakusgarri dela azken bost urteetan aurrekonturik onartu ez izana. Halaber, uste du UPNk Nafarroako Gobernuaren aurka egiteko erabili duela Iruñeko Udala. 

Hargatik, Zabaletak garrantzi handikotzat jo du PSNk emandako pausoa, eta balioa eman dio bi alderdiek aldaketa posible egiteko hartutako konpromisoari. EH Bilduko koordinatzaileak azpimarratu du akordio honek «garai berri bat» zabalduko duela Iruñean: «Iruñearen aldeko akordio bat da hau, adostasuna lehenesten duena». 

EH Bilduk eta PSNk egindako itunak hiru puntu jasotzen ditu, eta hainbat konpromiso. Lehena memoriari eta bizikedetzari dagokio: Iruñea memoriaren eta erreparazioaren hiri izatea nahi dute. Bide horretan, EH Bilduk konpromisoa hartu du ETAren biktimak aitortzeko, «erreparatzeko eta ez umiliatzeko». Eta Iruñeko aurreneko elkarbizitza plana babestuko du. 

Euskararen aldeko konpromisoa ere hitzartu dute, eta haren erabilera sustatzeko neurriak hartuko direla adierazi du. Baita indarkeria matxistari aurre egiteko neurriak ere. 

Bigarren puntuak hiria hobetzeko egitasmoei egiten die erreferentzia. UPNren gobernuak geldiaraziak zituen proiektuak aurrera eramateko konpromisoa hartu dute bi alderdiek. «Gure ustez, lehentasun hauek indar aurrerakoi guztien babesa jasoko dute», adierazi du Zabaletak.

Hirugarren ardatza, berriz, bi alderdien arteko ituna betetzeko bermeei lotuta dago. Jarraipen batzorde bat eratuko dute horretarako, zabaletak aurreratu duenez. EH Bilduk konpromisoa hartu du, halaber, udalaren 2024ko aurrekontuak onartzeko bidea lehenbailehen hasteko, bai eta Nafarroako Gobernuarekin lankidetzan aritzeko ere. 

Abenduaren 28an bilkura

Joseba Asironen arabera, lehen harria jarri dute paralisia atzean uzteko. «Blokeoa» atzean utzi eta herritarren beharrei erantzuteko garaia dela adierazi du: «Eskuineko gobernuaren alternatiba lortzeko bidea abiatu dugu». 

Asironek esan du Iruñea berriz «martxan» jarriko dutela, eta lan egingo duela baliabide guztiak erabilita Iruñea hobea izan dadin lortzeko. «Lehen eguneko ilusioa eta Iruñearekiko konpromisoa» duela azpimarratu du. «Gure onena emango dugu hirian elkarbizitza eta elkar ulertzea lehenesteko».

Azaldu du UPNren «ezgaitasunaren» ondorioz proiektuak atzeratu direla, eta hiriarentzat kaltegarria izan dela hori. Iruñeari begirako lehentasunak zeintzuk diren zerrendatu du. Horien artean dago, besteak beste, Nafarroako Gobernuarekin elkarlanean etxebizitza plan bat eratzea; Sarasate pasealekuko lanak egitea; Erorien Monumentuan esku hartzea, memoria demokratikoaren ikuspegitik proiektua garatzeko eta horretarako herritarren parte hartzea sustatzeko; eta Zangoza kaleko aparkalekuaren proiektua gelditzea.

Asironek eskerrak eman dizkie mozioa babestu duten gainerako indar politikoei, eta iragarri du bilera sail bat abiatuko duela bihar bertan gobernu programaz hitz egiten hasteko. «Egun trinkoak ditugu oraindik abenduaren 28ko osoko bilkurara arte», esan du. Egun horretan egingo baitute zentsura mozioa bozkatzeko osoko bilkura.