Arabako zahar etxe pribatuetako eta etxebizitza komunitarioetako langileek lau urte baino gehiago daramatzate «baldintza duinak» bermatuko dituen hitzarmen baten alde borrokan, eta gaur greba eguna dute berriro. Protestekin hasi zirenetik 37. lanuzte eguna dute gaurkoa, eta aurtengo bosgarrena. ELA eta LAB sindikatuek deitu dute grebara, eta, bi sindikatuen arabera, deialdia «erantzun zabala» ari da izaten, nahiz eta egoitzetan ezarri dituzten gutxieneko zerbitzuak %70ekoak izan. Gainera, sindikatuek azpimarratu dute zahar etxeetako sektorea «prekarizatua, migratua eta feminizatua» dagoela, eta, beraz, deialdiaren arrakastaren interpretazioak ikuspuntu kuantitatibotik harago egon behar duela.
Erresidentzietako langileek elkarretaratzea egin dute 11:00etan Arabako Diputazioaren aurrean. Arratsalderako, berriz, manifestazio batera deitu dute, 18:00etarako, Gasteizko Babesgabetuen plazatik Probintzia plazaraino. Amaieran, ekitaldia egingo dute.
Sindikatuek ekainean aktibatu zuten negoziazio mahaia, baina artean ez dute akordiorik lortu. Aurreko astean egindako bileran patronalak egindako proposamena «eskasa» izan zela salatu dute bi sindikatuek, iritzi diotelako langileak «prekaritatean betikotzen» dituela. Aurreko greba deialdietan bezala, pentsiodunen mugimenduak, egoiliarren senideek eta mugimendu feministak babestu dute grebalarien borroka. Sindikatuek txalotu egin dute kolektibo horien engaiamendua: «Gatazka, lan arlokoa izateaz gain, soziala eta politikoa ere bada, eta herritar guztien inplikazioa eskatzen du».
