Lankidetza hitzarmena izenpetu dute Araba Euskaraz jaiaren antolatzaileek eta BERRIAk. Ekainaren 16an izango da Arabako ikastolen festa, Gasteizen, Olarizun, Mugaezin leloaren inguruan ardaztuta. Hezkuntzaren arloko beste hainbat dinamikatan ere egin duen eran, BERRIA jai honen parte eta eragile izan da aurreko urratsetan, eta egunean bertan ere hantxe izango da. Jaiaren babesleetako bat da.
BERRIA hezkuntza eragileekin harremanak sendotzeko ahalegin betean dabil, «euskaraz bizitzeko ekosistema irudikatzeko helburuan» bat egiten duten neurrian. Aliantza horiek berebiziko garrantzia dutela uste du.
Horiek horrela, BERRIAk gune propioa izango du festan; han ekitaldi klase ugari egingo dira Araba Euskaraz-era joaten diren euskaltzaleen gozagarri, eta, besteak beste, Miren Arandia ilusionistaren emanaldia eskainiko dute. Maiatzaren 18an egin zuten Mugaezin eguna, eta hara ere Mantangorri eskulan tailerra eta Pontx pailazoaren ikuskizuna eraman zituen BERRIAk.
Jaiari buruzko publizitate eta merchandising eskaintzetara begira ere hitzartu dituzte lankidetza akordioaren zehaztasunak.
BERRIAko marketin arduradun Ainara Lasa Perezek eta Arabako Ikastolen Elkarteko Unai Mendizabal Elezkanok izenpetu dute akordioa.
