Urtebete igaro da Eusko Jaurlaritzako Hezkuntza Sailak finantzaketa publikoa duten eskoletan sakelako telefonoaren erabilera arautzeko eskatu zuenetik. Eta, denbora horretan, eskola guztiek hartu dute neurriren bat gailu horien eta erloju adimendunen erabilera mugatzeko. Begoña Pedrosa Hezkuntza sailburuak eman ditu datuok, Gasteizen, Hezkuntza eta Teknologia izeneko jardunaldietan.
Haur hezkuntza, lehen hezkuntza, bigarren hezkuntza, batxilergo eta lanbide heziketako zentroetan hartu dituzte neurriak. Sailburuak emandako datuen arabera, lehen hezkuntzako irakaskuntzan, eskolen %85ek guztiz debekatu dute sakelako telefonoak erabiltzea, eta gainontzeko %15ak helburu pedagogikoetarako baino ez dute utziko sakelakoak erabiltzen.
Bigarren hezkuntzan, sakelakoak helburu pedagogikoetarako erabiltzen utziko dute zentroen erdiek. Batxilergoan, zentroen laurdenetan guztiz debekatuta dago irakastorduetan sakelakoa erabiltzea; zentroen %60k, berriz, sakelakoa erabiltzen uzten dute, baina aipatutako helburu pedagogikoetarako soilik. Hala ere, adierazi dute ez dagoela sakelakoak nahierara erabiltzen uzten duen zentro bat bera ere.
Lanbide heziketan, zentro gehienek —%70ek— sakelakoa erabiltzen uzten dute, baldin eta erabilerak ikasteko prozesua elikatzeko helburua badu.
