Antiguedadek Kongresuko diputatu kargua utziko du

Iñaki Antiguedad Amaiur koalizioko Bizkaiko diputatuak Espainiako Kongresuko eserlekuari uko egingo dio «bizpahiru aste barru», Zuzeu webgunean egin zioten elkarrizketan jakinarazi duenez. Diputatuaren Estatutuaren batzordeak ebatzi du haren diputatu lana eta EHUko irakasle lana ez direla bateragarriak, eta, ondorioz, Antiguedadek eserlekua uztera «behartuta» ikusi du bere burua. Horrela, EHUko Zientzia eta Teknologia Fakultatean lanean jarraitzea erabaki du. Edozein modutan, Antiguedadek adierazi du jarduera politikoarekin jarraitzeko asmoa duela.

Legeldiaren hasieran, Antiguedadek uko egin zion diputatu gisa zegokion soldatari, Kongresutik kanpo beste lanpostu bat zuelako. Hauteskunde legearen arabera, diputatu karguak ardura osoa eskatzen du, eta ez du onartzen beste lanbide batekin uztartzea. Hala ere, orain arte Kongresuko Diputatuaren Estatutuaren batzordeak 130 diputaturi baino gehiagori utzi diete Kongresutik kanpo beste lanpostu bat izaten. Horietatik 60 baino gehiago alkate edo zinegotzi postuetan dabiltza, soldata bati uko eginda.

Amaiurrek prentsaurrekoa eskainiko du, gaur, Antiguedad zeinek ordezkatuko duen azaltzeko. Joan den azaroaren 20ko hauteskundeean Amaiurreko Bizkaiko zerrendaburua izan zen Antiguedad. Haren eserlekua Onintza Enbeita kazetari eta bertsolariak hartuko du, Bizkaiko zerrendako zortzigarrenak. Horretarako, zerrendan aurretik daudenek uko egin beharko diote karguari. Onintza Enbeita (Muxika, 1979), BERRIA-ko kazetaria izan da eta egun zutabegilea da.

Bateratzeko gai

Atzo, ohar batean, koalizioak adierazi zuen Kongresuko Diputatuen Estatutuaren Batzordeak «ezinbestean» behartzen zueladiputatu kargua uztera. Amaiurrek azpimarratu du Antiguedadek jarduera militantea eta profesionala bateratu egin dituela azken urteotan: «Eusko Legebiltzarrean, Bizkaiko Batzar Nagusietan eta Espainiako Kongresuan egin duen lan eta jarduera instituzionala ikuspegi militante batetik garatu du, eta jarduera horretan Iñakik beti eutsi dio unibertsitateko bere irakasle lanari». Koalizioak gogorazi duenez, hauteskunde kanpainan bertan argi utzi zuen kargu instituzionalaren eta profesionalaren artean aukeratzera behartuko balute «koherente» izaten jarraituko lukeela.

Antiguedadek berak diputatu kargua utz zezakeela aurreratu zuen iazko azaroan, Argia astekarian egin zioten elkarrizketa batean: «Ez dut sekula politika modu profesionalean ulertu. Orain dela hamar urte utzi nuen politika instituzionala, eta orain berriz ere heldu diot. Baina ez orduan, ez orain, ez gero, politikatik bizitzeko inolako asmorik gabe», adierazi zuen.