Anann, Ahern, Brundtland, Adams, Joxe eta Powell Aieten izango dira

Nazio Batuen Erakundeko idazkari nagusi ohi Kofi Anann, Norvegiako lehen ministro izandako Gro Harlem Brundtland, Irlandako lehen ministro ohi Bertie Ahern, Frantziako Barne eta Defentsa ministro izandako Pierre Joxe sozialista, Sinn Feineko lehendakari Gerry Adams eta Tony Blair lehen ministro zela haren kabineteburu izan zen Jonathan Powell dira bihar Donostian egingo den Euskal Herriko Gatazkaren Konponbidea Sustatzeko Nazioarteko Konferentzian parte hartuko duten nazioarteko pertsona ezagunak.

Atzo eman zuten horren berri HNT Harremanetarako Nazioarteko Taldeko kide Sylvia Casalek eta Lokarriko koordinatzaile Paul Riosek. Biek baieztatu zuten Tony Blairrek ere Aieteko konferentzian parte hartzeko asmoa bazuela baina Ekialde Hurbilean egiten ari den bitartekaritza lanek aginduta ezin izango zuela azkenean parte hartu. Blairrek Powell bidali du bere ordezko gisa.

Pisu handiko nazioarteko ordezkaritza osatzen du seikoteak, guztiek parte hartu izan baitute hainbat gatazka konpontzeko prozesuetan, dela alde batean, dela bitartekaritzan, eta batzuek bi alorretan.

«Bake prozesuetan eta gatazken eraldaketan eskarmentua, ezagutza eta zuzeneko inplikazioa dute guztiek. Normalizazio politikoa lortzeko gobernuak, erakundeak, alderdi politikoak eta gizarte taldeak gauzatzen ari diren ahaleginak aberats ditzakete horiek guztiek», azaldu zuen Casalek.

HNTko ordezkariak berretsi zuen nazioarteko konferentziaren helburua dela «erabateko normalizazio, gardentasun eta inklusio politikoan oinarritutako egoera lortzea». Egoera hori « soilik baliabide demokratikoak baliatuz eta inongo indarkeriarik edo indarkeriaren mehatxuaren erabilerarik gabe» lortu behar dela ere nabarmendu zuen. Era berean, konferentziaren erakunde eta talde bultzatzaileek «bake prozesu barneratzaile bat sostengatzen duen nazioarteko komunitatea» ordezkatzen dutela azpimarratu zuen, «era xume eta errespetuzkoan, modu partekatuan hain desiratua den normalizazio politikoa lor dezazuen adoretu eta laguntzeko».

Antolatzaileen izenean, Casalek desio bat azaldu zuen: «Euskal gizarteak itxaropena berreskuratu duen une honetan, Euskal Herrian gatazkaren konponbidea sustatzeko nazioarteko konferentzia aurrerapauso adierazgarriagoa izan dadila, nazioarteko komunitatearen ekarpen berri bat izan dadila».

Ia alderdi politiko guztiak

Paul Riosek konferentzian izango diren alderdi politiko eta sindikatuen zerrenda aurkeztu zuen. Hauek parte hartuko dute: EAJk, PSE-EEk, ezker abertzaleak, Eusko Alkartasunak, Aralarrek, Abertzaleen Batasunak, Alternatibak, Ezker Batuak, Geroa Baik, Ezkerrak, UMPk, PSFk eta Modemek, alderdi politikoei dagokienez; ELAk, LABek, CCOOk, UGTk eta CFDTk, sindikatuei dagokienez.

Konferentzia 14:00etan hasiko da; osoko bilkura bat izango da, baina ateak itxita egingo dute. 17:00etan, nazioarteko pertsona ezagunek ondorioen berri emango dute. Parte hartuko duten ordezkari guztiek hartuko dute hitza, eta guztiei eskatu zaie aurretik euren ekarpenak, proposamenak eta iradokizunak helarazteko, nazioarteko pertsona ezagun horiek aurretik azter ditzaten eta ondorioak prestatzeko denbora gehiago izan dezaten.

PPk, UPNk eta UPDk ez dute parte hartuko nazioarteko konferentzian. Riosek haientzako hitzak ere izan zituen. Hartu duten erabakiari «errespetua» adierazi zion Lokarriko ordezkariak. Dena den, Riosek aurreratu zuen asmoa dutela konferentzian aterako dituzten ondorioak bihar Aieten izango ez diren alderdiekin ere partekatzeko.