Zaila da, aitortzen dut. Argudio positiboez eta itxaropenaz hitz egitea asko kostatzen da garai hauetan. Pandemia bizkarrean daramagun harlauza emozional baten gisakoa da; irratia entzuten dugun bakoitzean, telebista ikusten dugun bakoitzean edo egunkari bat irakurtzen dugun bakoitzean neke bihurtzeraino. Jasotzen dugun informazio-jausian albiste negatiboak dira nagusi, bai gure udalerrietan intzidentziak etengabe gora egin duelako, bai gainera datozkigun murrizketen gorakadagatik, bai tantaka-tantaka heltzen diren txertoen biharamunagatik, bai birusaren aldaera berriengatik, zeinak, dirudienez, mehatxu egiten digun berriro ere pandemiaren irteera-laukitik hastearekin.
Gaur albiste positiboak soilik partekatu nahi ditut. Irakurleen osasun emozionalaren alde egiten dut, baina baita neurearen alde ere. Izan ere, hainbeste ziurgabetasunen artean, badira itxaropenerako eta baikortasunerako deia egiten diguten albisteak ere.
Lehen albiste positiboa immunitatearekin lotzen da. Badirudi baieztatzen ari dela infekzio naturalaren ondoren gutxienez sei eta zortzi hilabete bitartean irauten duen erantzun immunitario bat garatzen dela (ez da denbora nahikoa igaro iraunkorragoa den jakiteko). Immunitate horrek B memoria-zelulak izango lituzke, funtsezkoak birusaren sarrera berri baten aurrean antigorputzak garatzeko, eta T linfozitoak (erantzun zelularra), zelula gaixoentzat ekintza defentsiboak eta suntsitzaileak koordinatzeaz arduratzen direnak.
Beste haize bolada fresko bat medikamentuen eremutik dator. Duela gutxi jakin da bamlanivimab eta etesevimab antigorputzek ospitaleratze eta heriotza arriskua (gertaerak) % 70eraino murrizten dutela COVID-19a duten pazienteetan. Datu horiek gehitu behar zaizkio hilabete batzuk lehenago dexametasonak eta interleukina 6a inhibitzen duten farmakoek deskribatutako eraginkortasunari.
Azkenik, nabarmena da txertoekin lotutako kontrako erreakzioen kopurua—eta, gure kasuan, orain arte nagusiki eskuragarri dagoena Pfizerrena da— oso txikia dela: 374 kasu estatu osoan, % 0,06 txertatuak. Sendagaien Espainiako Agentziaren arabera, erreakzio gehienak arinak dira, eta lau kasu larri baino ez daude alergia aurrekariak zituzten pertsonen artean. Bide batez, Pfizer eta Modernaren ARNm txertoak eraginkorrak direla dirudi, koronabirusaren aldaera ingeles eta hegoafrikarren aurrean. Egia da hegoafrikarraren aurrean ez dutela babes maila bera eskaintzen, baina ez immunizazio arazo bat sortzeko adina.
Baikortasun dosi bat, medikuek agindu beharko luketena.
![Gorka Orive. Gorka Orive.](https://www.berria.eus/uploads/s1/30/02/22/gorka-orive.png)
ZIENTZIA PENTSALDIAN
Positibotasun injekzio bat
Iruzkinak
Ez dago iruzkinik
Ordenatu