Aldarrikapenarekin bat eginez, atzo Bilbon antolatutako ekitaldian Manuel Fernandez medikua ere izan zen, Gurutzetako Ospitaleko Neurologia zerbitzukoa (Barakaldo, Bizkaia).Fernandezen ustez ere ikerketa ezinbestekoa da, arriskuko biztanleria zehazteko: «Horren bidez zilegi litzateke 10-15 urteren buruan tratamendu prebentiboak lortzea». Hain zuzen, helburu horren bila ikerketak egiten ari dira dagoeneko Euskal Autonomia Erkidegoko hainbat neurologia zerbitzutan, Fernandezen arabera. «Alzheimerraren hasieran eta garapenean eragina duten markatzaile genetikoak ikertzen ari gara, hala nola odoleko proteina bat, gaixotasuna garatuko duten pazienteak aurretiaz diagnostikatzeko balio duena».
Ume direnen geroa, hobea
Aurreikuspen are baikorragoa egin zuen Araclon Biotech bioteknologia enpresako ordezkari Jose Luis Uliaquek. «Guk alzheimerra dugu, baina ikerketei esker, gure umeek ez dute izango».
Alzheimerra 65 urtetik gorako herritarren %10ek garatzen duten gaixotasuna da. Biztanleriaren zahartzeak, hain zuzen, datozen urteetan gaixo kopurua handitzea eragingo du. Ikerketarako dirua biltzeko asmoz, Bizkaiko Alzheimerdunen Senideen Elkarteak Bilboko Euskalduna jauregian gala bat antolatu du hurrengo larunbaterako. Bertan, Urko Azkonaren hainbat koreografia ikusi ahalko dira.
