Bere burua desegin aurretik, Ehun mugimenduak 101 mozio aurkeztu zituen Euskal Herriko beste horrenbeste udaletan. Bada, Alkizak (Gipuzkoa) aho batez onartu zuen atzo «euskal errepublikaren parte» dela. Halako mozio bat onartu duen bigarren udalerria da. Aurrez, Plentziak (Bizkaia) hartu zuen erabaki bera.
Mozioan, Ehunek defendatzen du udalak direla herritarrengandik gertuen dauden erakundeak, nahiz eta sarri «herritarren interesak babesteko erremintarik» ez izan. Zehazki, argudiatzen da Espainiako eta Frantziako estatuetako legedia dela medio euskal herritarretatik urrun hartzen direla erabakirik garrantzitsuenak.
Horri aurre egiteko, mozioak hiru puntu ditu. Batetik, «euskal errepublika herritar guztien ongizaterako derrigorrezko erreminta gisa» aitortzea. Bestetik, «erreminta horrek eskubide guztiak guztiontzat ziurtatuko lituzkeela baieztatzea». Eta, azkenik, aurreko bi puntuekin bat eginez, udalak bere burua «euskal errepublikaren parte» deklaratzea. Horiekin bat egin du Alkiza Abertzale Ezkertiarrak. Plataforma horretako kide dira alkatea eta zinegotzi guztiak.
Ehun mugimenduak martxoan iragarri zuen desegin egingo zela, sei urteko ibilbideari amaiera emanez. Zehazki, oharrean azaldu zutenez, «elite independentistak Espainian ezinezkoa zela esateari utzi eta Espainian aukera leihoa zegoela esaten hasi zenean» erabaki zuten urrats bat egitea, eta ordutik hainbat ekintza egin dituzte independentziaren alde; nabarmenenetako bat izan da, hain zuzen, udaletan mozioak aurkeztea.
Mugimenduko kideen esanetan, Espainiak eta Frantziak ez diote sekula autodeterminazio eskubidea onartuko Euskal Herriari, eta, ondorioz, ez dago aldebikotasunaren bidetik aurrera egiterik. Hala, horri uko egin ez badiote ere, aldebakartasuna lehentasuntzat jo dute, eta burujabetzaren aldeko ariketa gisa planteatu mozioak.
Plentziako Udalak iazko maiatzean onartu zuen, eta mugimenduak beste 101 udaletara zabaldu du egitasmo bera; tartean dira, besteak beste, Euskal Herriko zazpi lurraldeetako hiriburuak. Horietako batean, Gasteizen, hilaren 16an eztabaidatuko dute mozioa, Ehunek jakinarazi zuenez.
Eztabaida osoko bilkura batean eztabaidatzen lehena Durangoko Udala izan zen, baina hark ez zuen onartu. EAJk, PSE-EEk eta PPk kontra bozkatu zuten, eta EH Bildu eta Herriaren Eskubidea abstenitu egin ziren. Horren ordez, EH Bilduk eta EAJk mozio alternatibo bat onartu zuten, bi indar abertzaleek batzar nagusietan onartutakoaren bidetik. Besteak beste, erabakitzeko eskubidea, nazio aitortza eta aldebikotasuna zituen testuak oinarri.
Ehunen asmoa zen Euskal Herriko udal guztietan halako ekinaldiak aurkeztea, aitortu zutenez, baina ezin izan dute: «Elite independentistaren ezezkoak ekarri duen lan gehigarriari aurre egiteko Ehun ez da nahikoa izan». Halere, mozioa eskuragarri jarri dute euren webgunean, etorkizunean beste udalen batean aurkezteko aukera egongo balitz ere. Herritarrei eskatu diete lan hori euren gain hartzeko.
