Alga toxikoak atzeman dituzte Lapurdiko hondartzetan

Turismoaren garai bete-betea den honetan, atzo goizean Miarritzeko hiriak (Lapurdi) komunikatu baten bitartez jakinarazi zuen hondartzak hetsi egingo zirela, hainbat pertsonak sintoma patologikoak garatu zituztelako. Sintoma horien jatorrian Ostreopsis ovata alga dago. «Erreakzio epidermikoak eta gripe moduko bat» izan daitezke alga horren ondorioak. Sintoma horiek dituzten pertsonei «mediku baten ikustera» joan daitezela kontseilu eman diete.

Eskualdeko Osasun Agentziak analisiak egin ditu, eta atzo goizean bilkura bat egin zuten hunkiak izan diren hiriekin, Euskal Hirigune Elkargoarekin eta Frantziako Estatuko zerbitzuekin batera. Arratsaldearen bukaeran, Eskualdeko Osasun Agentziak eta Miarritzeko hiriak jakinarazi zuten hondartzak berriz irekitzen ahal direla. Lapurdiko hondartza gehiago ere hetsi zituzten: Bidartekoa, Getariakoa eta Donibane Lohizunekoa. Ez da lehen aldia hondartzak mota horretako arazo batengatik hesten direla, eta, ingurumenaren alde ari diren elkarte anitzen ustez, aldaketa klimatikoak eragina du horrelako fenomenoetan.

Surflariak lehen eriak

Ostreopsis ovata alga Ipar Euskal Herriko Kostaldeko hondartzetako uretan aurkitu dute. Victor Pachon Euskal Herriko eta Hego Landetako Ingurumenaren Defentsaren Elkarteen Kolektiboko (CADE) kideak azaldu zuen surflariek jo zutela lehenbiziko deiadarra: «Surflari anitzen deiak errezibitu ditugu; azkurak eta hats hartzeko arazoak aipatu dizkigute».

Pachonen aburuz, alga berri horren jatorriak zerikusi zuzena du giza jarduerarekin, baina ez horrekin bakarrik. «Aroa anitz aldatzen da, eta, nitrato gehiegi bada, algak horrekin elikatzen dira». CADEko kidearen erranetan, udaren lehen erdia oso euritsua izan da, eta hirietako euri urak eta ur zikinak kanalizazio bakar batean biltzen direnez haztegian, euria egiten duelarik haztegi horiek ez dira gai ur guztiaren biltzeko. Izan ere, «ur guztiaren parte bat haien kargu hartzen dute, baina bestea zuzenean erreketan husten dute. Sistema berezitu bat izan behar litzateke: bat euri urarentzat eta bestea ur zikinentzat. Gauza da biziki kario dela eta lan anitz egitekoak direla; dena haustekoa litzateke».

Duela urte batzuk, ortzi aska bat instalatu zen Miarritzen, ur nahasien biltegiratzeko haztegia hustuko zen bitartean. Baina, «hainbeste egunez euria egiten duelarik, ortzi aska ere betetzen da, eta arazoa berdin geratzen da. Pachonen arabera, «etengabeko zirkuitua da».

Gainera, CADEko kideak Eskualdeko Osasun Agentziaren lana salatu du. Pachonen ustez, «ez ditu kontuan hartzen bainatzea debekatua diren egunak, ura bortitzegia edo kalitatea txarrekoa delako». Egun horietan, jenderik ez delarik bainatzen, «Eskualdeko Osasun Agentziak ez du ura aztertzen». Pachon: «Agentziaren rola giza bizitzaren babestea baizik ez baita; beraz, bainatzea onartuak diren egunak baizik ez ditu begiratzen». Logika horretan, jendea bainatzen ahal den egunetan baizik ez bada ura aztertzen, «hondartzak beti izango du %100eko kalitatea». Pachonek dioenez, «emaitza horiek faltsutuak dira», eta «kalitatea baino urrunago» begiratu behar da. «Hondartzak %100eko nota du, baina beharbada urtean 27 egun erdiz hetsia da uraren kalitatea txarra delako, baina, bortxaz, egun horietan probarik ez da egiten».

Biharkoan konfiantza

CADEko kideak esperantza zuen berotasunarekin eta euririk egin gabe egoera ondoko egunetan hobetuko zela. Denbora aldatzen ari da, eder egiten hasten du, eta «euri askorik ez da izanen; beraz, nitrato isurketa apaldu egingo da».

Erran bezala, hondartzak berriz ireki dira, Miarritzeko hiriak komunikatu batean agerrarazi duenez. Eri izan diren pertsonek zintzurreko mina, azkurak eta hats hartzeko zailtasunak izan dituzte, baina, Pachonen informazioen arabera, «nehor ez da ospitaleratua izan».