Alabekin egon ezinik dute Zengotitabengoa presoa

Euskal preso bakarra dago Portugalen: Andoni Zengotitabengoa. Lisboako Monsanto espetxean dute, Portugalek segurtasun gorenerako duen kartzelan. Bizi-baldintza gogorrak ditu, muturrekoak, Etxerat-ek berri eman duenez. Baina zailena familiarekin harrema mantendu ezina egiten zaio. Eta ez presoari berari soilik, baita Iera Abadiano bikotekideari, eta dituzten bi alabei. Abadianok kontatu du familiak jasaten duena, batez ere alabek aitarekin harremana izateko duten eskubidea aldarrikatzeko.

Lau urte daramatza Zengotitabengoak Monsanton preso, eta ordutik, urtean behin izan du alabak besarkatzeko aukera. Kristal atzeko bisitak egiteko aukera izan badute, baina Abadianok kontatu duenez, metro bat eta hogei zentimetroko garaieran dago bisiten gelako kristala. Altuera horren parekoa da alabarena. Beraz, pareta du begien aurrean. Aita ikusi ezinik ibiltzen da, saltoka, edo nagusiek altxatzen dute ikusi ahal izateko. Lagunen bisitarik ez du baimendua presoak. Senideek ezin diote asteroko bidaiari aurre egin: 250 euro eta indar handia xahutzen dute bidaian.