«Akordioak posible izan dira jarrera jakobinoak nagusi ez diren tokietan»

Ziburu Bizi zerrenda abertzalea gidatzen du Eneko Aldana 24 urteko gazteak. 802 boz (%21) bildu zituen joan den igandeko herriko bozen lehen itzulian. Negoziazio luzeen ondotik, Henri Duhaldebordek gidatzen duen zerrenda sozialistarekin akordioa adostu dute bigarren itzuliari begira. Herriko etxea eskuratzeko aukera handiak ukanen ditu sozialista eta abertzaleen arteko zerrendak.

Bigarren itzulian presente egoteko eskubidea lortu ondoren, sozialistekin tratua egitea deliberatu duzue. Zergatik?

Zerrenda aurkeztu genuelarik jakinarazi genuen prest geundela hitzarmenak egiteko, baldin eta programa baten inguruan gauzatzen bazen. Emaitza ona lortu genuen igandean, eta indar horrekin, posible izan da bigarren itzulirako akordioa lantzea. Hastapenetik erran genuen gure programan agertzen ziren puntuak zirela akordioaren oinarria. Programa onartzeaz gain, hori garatzeko bermeak eskatzen genituen. Bigarren baldintza zen bermearena. Luzeak izan dira negoziazioak, baina azkenean, hautagai sozialistak onartu ditu gure baldintzak, eta posible izan da akordioa lortzea. Horregatik izan da posible bi zerrendak bat egitea.

Sozialistek zuen programako puntu nagusiak onartu dituztela diozu. Zein dira programa horren elementu nagusiak?

Gure programan biltzen zen puntu nagusia etxebizitzarena da. Etxebizitzarena arazo handia da Ipar Euskal Herrian eta baita Ziburun ere. Arazo horri erantzunak eman zaizkio, eta pentsatzen dugu oro ahalduna den eraikuntzari alternatibak eman behar dizkiola herriko etxeak. Bigarren etxebizitzen kopurua ere arazo nabarmena da. Pentsatzen dugu etxe berriak eraiki aitzinbeharrezkoa dela optimizatzea dagoeneko eginak dauden etxebizitzak. Hutsik egoten diren etxebizitza horien erabilpena gogoetatu behar dugu eta alternatiba eman.

Euskararen gaia ere presente egon da, programan zein negoziazioetan?

Lehentasunezko gaia da euskararen normalizazio plan bat sortzea Ziburun. Baina plana eraginkorra izan dadin, baliabideak behar dira, eta horrela biltzen ziren gure programan. Funtsezkoak dira baliabideak, programa garatu ahal izateko. Presente izan da ere Kaskarotak ikastolaren gaia. Pentsatzen dugu kokapen egonkor bat eman behar diogula Ziburuko hirigunean. Kezka hori mahai gainean dago, eta egitasmo hori garatzeko xedea dugu. Ekonomia arloan ere hainbat proposamen biltzen dira gure programan. Gure iritziz, beharrezkoa da arrantza batzordea sortzea, arloko beharrei ihardesteko. Eskumen hori ez dago soilik herriaren menpe, herri elkargoaren eskumena baita. Hirigintza planean ere, zirkulazioa arautzeko plana behar da. Behar-beharrezkoa da komertzio txikien sarea atxikitzeko eta garatzeko. Bistan da deusetarako balio ez duten proiektu erraldoi xahutzaileen aurka gaudela, eta programan azaltzen da AHTaren aurkako jarrera.

Zerbitzu publikoen defentsa ere ageri da zuen programan?

Bai. Bertzeak bertze, Ziburuko portuaren kudeaketa publikoa bultzatzea proposatzen dugu.

Bi zerrendak batean bildu ahal izateko, programaz gain, zinegotzi postuak ere negoziatu dituzue?

Akordioaren oinarria gure programa zen. Hori onartu dutelarik, programa hori betetzeko bermea eskatzen genuen. Horretarako adostu dugu, heldu den igandean herriko etxea irabazten baldin badugu, hautetsien erdiak gure zerrenda kideek osatuko dugula. Alegia, hamaika hautetsi izanen genituzke, sozialistak beste. Gure hautetsietako bat ordezkari izanen da herri elkargoan.

Hainbat herritan, Ziburun bezala, posiblea izan da abertzale eta sozialisten arteko akordioa. Baionan, adibidez, ez. Zergatik?

Uste dut galdera horren erantzuna aski argia dela. Akordio horiek posible izan dira sozialisten jarrera jakobinoak nagusitzen ez diren tokietan. Herri elkargoaren eta euskararen aldeko jarrerak dauden tokietan, posibleak dira akordioak. Bi gai horiek mahai gainean jartzen ditugu, eta horiek onarturik, akordiorako ateak irekitzen dira.