AENAko sindikatuek 25 greba egun iragarri dituzte irailetik aurrera egiteko

Sindikatuen eskaria betetzen bada, Hego Euskal Herriko aireportuek ezohiko funtzionamendua hartuko dute irailetik aurrera. Espainiako Aireportuak eta Aireko Nabigazioko (AENA) sindikatuek 25 greba egun egitera deitu dituzte aireportuetako langileak. CIVCA Interpretaziorako, Zaintzarako, Kontziliaziorako eta Arbitrajerako Batzordeari iragarri diote erabakia. Irailaren 15ean hasiko dira, eta egun zehatzetan egingo dituzte hogeita lau orduko geldialdiak CCOO, UGT eta USOk adierazi dutenez; abenduaren amaiera arte egingo dituzte, Gabonak barne. Lan baldintza hobeak eta soldaten igoera eskatzen dituzte AENAko langileek, eta UGTk baieztatu duenez, Sustapen Ministerioak oraindik ez du erantzunik eman egiten dituzten eskakizunen inguruan. Beraz, grebarako bidean urratsak egiten jarraituko dutela adierazi dute.

Aldiz, konfiantza dutela ere adierazi dute: greba bertan behera utziko duen akordio bat egon daitekeela uste baitute. Hilaren 31n bilera bat egingo dute Julio Gomez-Pomar Azpiegitura estatu idazkariarekin.

Langileentzat abonamendu lineal bat eskatzen dute sindikatuek, AENAren emaitzetan parte har dezaten; izan ere, erosteko ahalmena %8 galdu dutela diote. Bestalde, AENAri 450 postu berri sortzeko eskatu diote, eta beste 250 postu Enaire aireko zirkulazioa kontrolatzen duen erakundeari, «segurtasun neurri egokiak» bermatuta izan ditzaten.

Greba egunek ondorioak izango dituzte, besteak beste, suhiltzaileen lanetan, aparkatzeko eta zintetako lanetan, segurtasunean eta mantentzeetan.