Bakarrik dauden adin txikiko migranteen harrera erregulatzeko eskatu dio Eusko Jaurlaritzak Espainiako Gobernuari, eta kontingentzia plan bat galdegin dio horretarako. Maria Ubarretxena Eusko Jaurlaritzako bozeramaileak iragarri du Eusko Jaurlaritzak eta Arabako, Bizkaiko eta Gipuzkoako diputazioek —eskumena diputazioena da— bihar egingo dutela eskaera. Espainiako Gobernuak eta erkidegoetako ordezkariek gai horri buruzko bilera bat egingo dute Tenerifen (Kanaria uharteak, Espainia).
Kontingentzia plan horren bidez, nahi dute «behin betiko irtenbidea» ematea bakarrik dauden migratzaile adingabeak lurraldeen artean banatzeko. Bozeramaileak ohartarazi du «autonomia erkidego guztietatik» eman beharko zaiola irtenbidea, «bakoitzaren eskubideak eta betebeharrak» kontuan hartuta.
«Jarrera solidarioa»
Ubarretxenak zehaztu nahi izan du Bizkaiak 511 migratzaile adingabe hartu dituela, Gipuzkoak 180 eta Arabak 70. «Errioxak [Espainia], berriz, bederatzi», gehitu du. «Jarrera solidarioa izango dugu, beti bezala, baina serio aritzeko eta kontingentzia plan bat osatzeko eskatzen dugu».
Gobernu Kontseiluaren goizeko bileraren ondoren, Ubarretxenak azaldu du egoera ez dela koiunturala, «egiturazkoa eta giza eskubideei dagokiena baizik». Adierazi du egoera hori konpontzeko modua aurkitu behar dela, eta Jaurlaritza horretan laguntzeko prest agertu da, baina uste dute «talde lanean» aritu beharra dagoela: «Arazo bateratua denez, modu bateratuan heldu behar zaio».
EAEn migratzaile adingabeen kudeaketa foru aldundien konpetentzia bada ere, Ubarrenetxenak esan du Jaurlaritza ere izango dela biharko bileran, telematikoki, aldundiekin adostutako ikuspuntua helarazteko.
