Abenduaren 6an jakinen du Oak lurralde debekua kenduko dioten ala ez

Parisko Zigor Auzitegiak abenduaren 6an jakinaraziko dio Oier Oa euskal preso ohiari Frantziako Estatuan egoteko 2015ean eman zioten lurralde debekua kenduko dioten ala ez. Atzo izan zuen auzi saioa Parisen: debekua kentzeko egin duen hirugarren eskaera; aitzineko bietan, eskaeraren kontra agertu zen epaitegia. Atzo ere, debekua ez kentzeko eskatu zuen auzitegiko prokuradore nagusiak. Sortzez donostiarra izanik ere, Lapurdin errotua da Oa azken urteetan; Larresoron (Lapurdi) du familiaren bizilekua, emaztearekin eta hiru semeekin batera. Baina Frantziako Poliziak atxilotu zuen iazko azaroan, lurralde debekua urratzea leporatuta, eta, ordutik, Zugarramurdin (Nafarroa) bizi da. Otsailean epaituko dute lurralde debekua urratzeagatik, Baionan.

Urte osoan babes andana jaso du Oak. Martxoan, izenpe bilketa bat abiatu zuten herritar eta hautetsi batzuek, eta Frantziako Gobernuari eta Europako Batasuneko arartekoari bidali zioten. Bernat Etxepare lizeoko ikasleak ere mobilizatu izan dira, eta elkarretaratze bat baino gehiago egin izan dituzte Oaren sostenguz. Atxilotu aitzin, lizeoko barnetegiko langilea zen, eta ikastetxe berarentzat segitzen du lanean gaur egun ere, telematikoki. Atzo, lasterkaldia egin zuten Hiriburun (Lapurdi) Oa atxilotu zuten lekutik lizeora, Oier, gurekin behar zaitugu! lelopean.