Behin EH Bildurekin akordioa lortuta eta etxeko lanak eginda, Nafarroako Gobernu kontseiluak 2025eko lege proiektua onartu du. Eguerdian, 13:00etan, Nafarroako Legebiltzarrean tramitatu du dokumentua, eta orain hilabete eta erdiko bidea egin beharko du bertan. Abenduaren 19ko osoko bilkuran bozkatuko da azkenik, eta EH Bilduren abstentzioak ahalbidetuta aterako da aurrera.
Kopuru handiei begira, 5.986,6 milioi euro izango ditu gobernuak, finantza gastuak kenduta, gastu eta inbertsio publikorako, aurten baino 51 milioi euro gehiago. Arastik nabarmendu du goranzko joera geldiezina dela, eta 2018tik %54 handitu dela. «Deigarria da datua, garai zailak utzi ditugulako atzean. Pandemiak etorkizunari buruzko zalantza ugari piztu zituen, eta ondorengo susperraldia agertoki belikoek astindu zuten, eta ekonomian eragin dute».
EH Bildurekin egin du akordioa gobernuak, eta UPN beste behin bazterrean geratu da. Horri buruz galdetuta, Arastik erantzun du zaila dela haiekin negoziatzea: «Astetik astera, ostegunero, gobernuaren jarduera kolokan jartzeko ahal duten guztia egiten dute, eta, lehendakaria iraintzen dutenez, gobernu osoa iraintzen dute. Beraz, zaila da haiekin esertzea».
Egutegia
Behin lege proiektua aurkeztuta, bere bidea egingo du parlamentuan: azaroaren 5ean kaleratuko da Nafarroako Parlamentuko Aldizkari Ofizialean; taldeek azaroaren 11ra arteko epea izango dute osoko zuzenketak aurkezteko eta hil horren 19ra arteko zuzenketa partzialak aurkezteko. Eskuineko alderdiek osoko zuzenketa aurkeztuz gero, azaroaren 21eko osoko bilkuran bozkatuko dituzte.
EH Bilduk horiek atzera botatzeko konpromisoa hartu duenez, abenduaren 9tik 13ra arteko astean eztabaidatuko dituzte zuzenketa partzialak Ekonomia eta Ogasun batzordean. Azkenik, abenduaren 19ko osoko bilkuran eztabaidatuko dituzte eta bozkatuko dituzte aurrekontuak.
