Etxarri II gaztetxearen hustea salatzeko, manifestazioa egin zuten ostegun iluntzean, 20:30ean, Errekaldeko osasun zentrotik abiatuta (Bilbo). Istiluak 21:00 aldera piztu ziren, eta Ertzaintzak gazteen aurka egin zuen. Gedar.eus-ek jakinarazi duenez, zauritutako gizona Irala auzoko bizilaguna da, eta Basurtun operatu behar izan zuten, urgentziaz, foam jaurtigailuak eragindako zauriagatik. EITBk zabaldu ditu gizonaren adierazpenak, erietxean bertan jasotakoak, eta halaxe kontatu du zer gertatu zen: «Ertzain batek, aurrez aurre jarri, barrabiletara apuntatu, eta tiro egin zidan». Argitu du ez zuela inolako liskarretan parte hartu, eta berariaz egin ziotela tiro: asmo «txarrez». Jakinarazi du erietxetik irten eta mediku agiriak eskura izatean salaketa jartzeko asmoa duela.
Beste bost pertsona ere zauritu ziren istiluetan. Ertzaintzak azaldu duenez, barne ikerketa bat hasi dute argitzeko gizonezkoa nola zauritu zen.
Bestalde, Ertzaintzak bost lagun atxilotu zituen manifestarien aurkako oldarraldian; lau aske daude, eta oraindik ez dute eman bosgarrenaren berririk.
